Izraıl atysty toqtatý týraly kelisim jarııalanǵannan keıin Lıvanǵa shabýyldy jalǵastyrdy
ASTANA. KAZINFORM — AQSh-tyń deldaldyǵymen qol jetkizilgen atysty toqtatý týraly kelisimge qaramastan, Izraıl-Lıvan baǵytyndaǵy jaǵdaı shıelenisken kúıinde qalyp otyr, dep habarlaıdy Kazinform agenttiginiń Taıaý Shyǵystaǵy menshikti tilshisi.
The Times of Israel basylymynyń habarlaýynsha, Izraıl armııasy beısenbi kúni Lıvannyń ońtústigindegi «Hezbolla» nysandary men ınfraqurylymyna qarsy operatsııalardy jalǵastyryp jatqanyn málimdedi.
Izraıl áskerı kúshteri sonymen qatar turǵyndardy Zahranı ózeniniń ońtústigindegi aýdandarǵa kelesi habarlamaǵa deıin oralmaýǵa shaqyryp, bul aımaqta áskerı áreketter jalǵasyp jatqanyn eskertti.
— Lıvannyń ońtústiginde shaıqastar jalǵasyp jatyr, óıtkeni Izraıl qorǵanys armııasy sizderdiń kentterińiz jáne olardyń mańynda ornalasqan «Hezbolla» nysandary men ınfraqurylymyna oq jaýdyrýyn jalǵastyryp keledi, — dedi TsAHAL ókili Avıhaı Adraı.
Lıvannyń ulttyq aqparat agenttigi beısenbide eldiń ońtústiginde kólikke taǵy bir shabýyl jasalǵanyn habarlady. Shabýyl saldarynan birneshe adam jaraqat aldy. Budan basqa, Izraıldiń drondary Lıvannyń ońtústigindegi Tır qalasynyń ústinde baıqalǵan.
Izraıldiń ulttyq qaýipsizdik mınıstri Itamar Ben-Gvır osyǵan baılanysty atysty toqtatý týraly kelisimdi synǵa alyp, ony «úlken qatelik» dep atady.
Onyń pikirinshe, qol jetkizilgen kelisimder «Hezbollaǵa» óz pozıtsııasyn álsiretýdiń ornyna nyǵaıtýǵa múmkindik beredi. Izraıldiń burynǵy qorǵanys mınıstri Avıgdor Lıberman da osyndaı alańdaýshylyq bildirip, atysty toqtatý qozǵalysqa kúshin qalpyna kelýge ýaqyt beretinin málimdedi.
Bul syn Izraıl men Lıvan AQSh-tyń deldaldyǵymen soǵys qımyldaryn toqtatýǵa keliskennen keıin kóp uzamaı aıtyldy. Bul rette Izraıl armııasy Lıvannyń ońtústigindegi «Hezbolla» nysandaryna shabýyl jasaýdy jalǵastyryp jatqanyn jáne shekaralas aımaqtarda áskerı kúshterin saqtap otyrǵanyn málimdep otyr.
Izraıl qorǵanys mınıstri Israel Kats armııanyń Lıvandaǵy áreket etý erkindigin saqtaıtynyn jáne Izraıl aýmaǵyna shabýyl jasalǵan jaǵdaıda Beırýtqa shabýyl jasaı alatynyn málimdedi.
Óz kezeginde Irannyń syrtqy ister mınıstri Abbas Aragchı Lıvan astanasyna jasalǵan kez kelgen shabýyl soǵystyń tolyq aýqymdy qaıta bastalýyna ákelýi múmkin ekenin eskertti.
Osyǵan deıin Izraıl men Lıvan AQSh-tyń deldaldyǵymen atysty toqtatý týraly kelisimge kelgenin habarladyq.
