Izraıl áskeriniń Djenın qalasyndaǵy reıdi kezinde úsh palestındik kóz jumdy
AMMAN. QazAqparat – Iordan ózeniniń batys jaǵalaýyndaǵy Djenın qalasynda ótken ızraıl áskeriniń reıdi kezinde úsh palestındik kóz jumyp, 10 adam jaralandy. Bul týraly «QazAqparat» tilshisi WAFA agenttigine silteme jasap habarlaıdy.
Izraıl qaýipsizdik kúshteri Djenın qalasynyń shyǵysynda kele jatqan kólikke oq jaýdyryp, úsh adamdy óltirgen dep habarlandy.
Bul oqıǵadan keıin jergilikti turǵyndar men ızraıl sarbazdary arasynda qarýly qaqtyǵystar boldy. 10 adam jaraqat aldy, olar medıtsınalyq kómek alý úshin aýrýhanaǵa jetkizildi.
Izraıl áskeri Djenınde eki jerde qarý-jaraq izdeý maqsatyndaǵy arnaıy operatsııa júrgizgenin málimdedi, dep habarlaıdy France24.
«Sarbazdar birinshi orynǵa kelgende, olarǵa oq atylǵan. Sondyqtan, ekinshi jerge bara jatqanda jol boıyndaǵy kúdikti avtokólikti kórip, jaýap retinde shara qoldanǵan», - delingen málimdemede.
WAFA keltirgen Palestına adam quqyqtary jónindegi ortalyqtyń málimetinshe, jyl basynan beri Izraıl kúshteri «Ierýsalımdi qosa alǵandaǵy okkýpatsııalanǵan aımaqtarda» 55 palestındikti óltirgen, onyń ishinde 13 bala men 5 áıel bar.
