Izraıl áskerıleri Sırııadaǵy Aleppo qalasyna shabýyl jasady

KAIR. KAZINFORM – Izraıl áskerı jasaǵynyń Sırııanyń soltústigindegi Aleppo qalasyna juma kúni tańerteń jasaǵan shabýylynan 38 adam qaza tapty. Onyń ishinde lıvandyq «Hezbolla» qarýly tobynyń 5 múshesi bar. Bul týraly Reuters jazdy.

Juma kúni tańerteń Sırııanyń qorǵanys mınıstrligi Izraıl men sodyr toptar Aleppoǵa shabýyl jasaǵannan keıin birneshe beıbit turǵyn men sarbazdyń qaza tapqanyn habarlady. Mınıstrliktiń málimdemesinde Izraıl áýe kúshteri jergilikti ýaqyt boıynsha tańǵy 1:45-te (GMT 22:45) Aleppodaǵy birneshe aýdanǵa soqqy bergen. 

Áýe shabýyldary Idlıb pen Alepponyń batys aımaqtaryna jasalǵan shabýyldarymen tuspa-tus kelgen, mınıstrlik «terror uıymdary» Aleppo jáne onyń aınalasyndaǵy beıbit turǵyndardy nysanaǵa alǵanyn aıtty. 

Alaıda mınıstrlik qaza tapqandardyń naqty sanyn jarııalamady. Zardap shekkenderdiń Izraıl áýe soqqysy nemese sodyr toptardyń shabýyldary saldarynan bolǵanyn da aıtpady.

– Agressııa birqatar beıbit turǵyn men áskerı qyzmetkerdiń qaza bolýy men jaraqat alýyna ákep soqty, - delingen habarlamada.

Bul oqıǵaǵa qatysty Izraıl áskerıleri túsinikteme berýden bas tartty.

Iranmen baılanysy bar sodyrlar, sonyń ishinde «Hezbolla» qazir Sırııanyń shyǵys, ońtústik jáne soltústik-batysyndaǵy úlken aýmaqtardy, sondaı-aq el astanasynyń aınalasyndaǵy birneshe eldi mekendi baqylaıdy.