Izraıl áskerıleri «Ash-Shıfa» aýrýhanasyndaǵy adamdardy bir saǵatta evakýatsııalaýdy talap etti - BAQ
Izraıl qorǵanys kúshteri Gaza sektoryndaǵy eń úlken «Ash-Shıfa» aýrýhanasyndaǵy adamdardyń barlyǵyn bir saǵat ishinde tolyq evakýatsııalaýǵa buıryq berdi, dep habarlaıdy arab BAQ men AFP agenttigi.
AFP tilshisiniń habarlaýynsha, mindetti evakýatsııalaý týraly daýys zoraıtqyshtar arqyly jarııalandy. Kazinform agenttigi bul týraly VVS News-ke silteme jasap habarlaıdy.
Áskerılerdiń buıryǵyn «Ál-Jazıra» jáne «Ál-Arabııa» telearnalary da habarlady. TsAHAL bul aıyptaýlarǵa qatysty túsinikteme bergen joq.
Izraıl áskerıleri birneshe kúnnen beri Gaza sektorynyń soltústigindegi «Ash-Shıfa» aýrýhanasynda operatsııa júrgizip jatyr.
TsAHAL málimetinshe, onyń astynda HAMAS-tyń komandalyq pýnkti ornalasqan. Izraıl qorǵanys kúshteri buǵan deıin aýrýhana astyndaǵy týnnelder kórinip turǵan birneshe fotosýretterdi jarııalady. Sonymen qatar jýrnalısterge «Ash-Shıfa» aýmaǵyndaǵy qarý-jaraqtardy kórsetken.
Budan bólek, áskerıler aýrýhana aýmaǵynan HAMAS-tyń 7-qazan kúni urlap áketken ızraıldik eki tutqynnyń máıitin anyqtaǵanyn málimdedi.
Bul rette aýrýhana astynda HAMAS-tyń komandalyq pýnkti ornalasqany týraly aqparattyń ras-ótirigi dáleldengen joq. HAMAS aýrýhanany sodyrlardyń áreketi úshin pana retinde paıdalanǵanyn úzildi-kesildi joqqa shyǵardy.
Izraıl buǵan deıin birneshe ret aýrýhana qyzmetkerleri men naýqastardy sektordyń ońtústigine evakýatsııalaýǵa shaqyrǵan, alaıda medıtsına qyzmetkerleri kóptegen naýqastardy tasymaldaý múmkin emes deıdi. BUU men Dúnıejúzilik densaýlyq saqtaý uıymy osy aptada naýqastar men aýrýhana qyzmetkerleriniń taǵdyryna qatysty «qatty alańdaıtynyn» bildirdi.
