Izraıl áskerı ushaqtary Lıvannyń ońtústigine birneshe ret soqqy jasady
ASTANA. KAZINFORM — Izraıl áskerı ushaqtary Lıvannyń ońtústigindegi Joǵarǵy Nabatııe eldi mekenine 15 mınýtqa jetpeıtin ýaqyt ishinde eki ret áýeden soqqy jasaǵan. Bul týraly Lıvannyń memlekettik aqparat agenttigi NNA habarlady, dep jazady Kazinform Anadolu agenttigine silteme jasap.
Izraıl áskerı-áýe kúshteri Joǵarǵy Nabatııe mańyndaǵy Alı-Tahır orman alqabyna da soqqy jasap, Kefertebnıt eldi mekenin qatarynan úsh ret bombalaǵan.
Sonymen qatar Izraıl áskeri Shyǵys Zavtar eldi mekenin artıllerııadan atqylaǵan.
Shabýyldar saldarynan qaza tapqandar men zardap shekkender týraly ázirshe aqparat túsken joq.
Eske salaıyq, buǵan deıin Izraıl men Lıvan arasyndaǵy kelissózderdiń jańa raýndy Rımde ótetinin habarlaǵan edik.
Aldyńǵy, jetinshi raýnd kelissózderi 4-6 tamyz aralyǵynda Rımde ótti. Lıvan premer-mınıstri Navaf Salam úkimet Izraıl áskeriniń tolyq shyǵarylýyna jáne eldiń ońtústigindegi turǵyndardyń qaýipsiz oralýyna qol jetkizý úshin kelissóz protsesin jalǵastyratynyn málimdegen.
Eske salaıyq, ahýal 2 naýryzda ýshyǵyp, sol kezde Izraıl áskeri Lıvan aýmaǵyna qarqyndy áýe soqqylaryn jasap, eldiń ońtústigindegi birqatar eldi mekendi basyp aldy. Lıvan bıliginiń málimetinshe, sonyń saldarynan elde úılerin tastap, basqa jerge qonys aýdarýǵa májbúr bolǵandar sany 1 mıllıonnan asty. 17 sáýirde qaqtyǵysty toqtatýǵa baǵyttalǵan atysty toqtatý týraly kelisim kúshine endi. Alaıda keıin bul kelisim birneshe ret uzartyldy.
