Izraıl áskeri úılerine qaıtýǵa árekettengen lıvandyqtarǵa oq jaýdyrdy
ASTANA. KAZINFORM — Jeksenbide Lıvannyń ońtústiginde 15 adam qaza taýyp, 80-nen astamy jaraqat aldy, dep habarlaıdy Euronews.
Izraıl juma kúni kelisimge qaramastan Lıvannyń ońtústiginen ázirge ketpeıtinin jarııalady. Biraq jergilikti turǵyndar ne bolsa da qaıtýdy uıǵardy.
Ótken jyldyń 27 qarashasynda Izraıl armııasy men shııttik «Hezbolla» sodyrlary arasyndaǵy qaqtyǵysty toqtatqan kelisimge sáıkes, TsAHAL áskerleri Lıvannyń ońtústiginen osy jeksenbide shyǵarylýy tıis edi. Biraq Izraıl juma kúni áskerı operatsııanyń jalǵasatynyn, óıtkeni Lıvan armııasy Lıvannyń ońtústigindegi barlyq aýdanda pozıtsııalardy ustanbaǵanyn jáne «Hezbollanyń» bul jerde óz qatysýyn qaıta ornatpaıtynyna kepildik bere almaıtynyn jarııalady. Lıvan armııasy buǵan jaýap retinde Izraıl áskerleri sheginbeıinshe, pozıtsııalardy ıelene almaıtynyn málimdedi.
Jeksenbide júzdegen jergilikti turǵyn aýyldaryna qaıtýǵa árekettendi. Lıvan bıliginiń málimetinshe, Izraıl áskerleri keıbireýleri «Hezbolla» týyn kóterip, atysty toqtatý kelisimine sáıkes TsAHAL-dyń elden shyǵýyn talap etken demonstranttarǵa oq jaýdyrǵan.
Qaza tapqandardyń arasynda eki áıel men Lıvan armııasynyń bir sarbazy bar, delingen eldiń Densaýlyq saqtaý mınıstrliginiń málimdemesinde.
Izraıl armııasy «Hezbollany» jeksenbi kúngi narazylyq sherýlerin týdyrdy dep aıyptady. Onyń málimdemesinde áskerler «jaqyndap kele jatqan kúdiktilerdi toqtatý» úshin eskertý oq atqany aıtylǵan. Habarlanǵandaı, Izraıl áskerimen jaqyn jerde bolǵan birneshe adam ustalyp, qazir olardan jaýap alynyp jatyr.
Lıvan prezıdenti Djozef Aýn jeksenbi kúni «Lıvannyń egemendigi men aýmaqtyq tutastyǵy kelissózderge jatpaıtynyn» aıtty. Ol «ustamdylyq tanytyp, lıvandyq áskerı kúshterine senim bildirýge» shaqyrdy.
Lıvan armııasy jeke málimdemesinde beıbit turǵyndardy shekaralyq aımaqtaǵy keıbir qalaǵa alyp baratynyn aıtyp, turǵyndardy qaýipsizdikti qamtamasyz etý úshin áskerı nusqaýlardy oryndaýǵa shaqyrdy.
Buǵan deıin Izraıl Lıvannan áskerin shyǵarý úshin qosymsha 30 kún suraǵanyn jazǵan bolatynbyz.