Izraıl áskeri Týlkarm qalasyna júrgizgen reıd barysynda myńdaǵan adamdy ustady
ASTANA. KAZINFORM – Izraıl áskeri Iordan ózeniniń okkýpatsııalanǵan Batys jaǵalaýynyń soltústigindegi Týlkarm qalasynda júrgizilgen aýqymdy reıd barysynda, ıaǵnı, eki kúnde myńnan astam palestındikti ustady, dep jazady, Anadoly.
Týlkarm gýbernatory Abdýllah Kamıl beısenbiden bastap Izraıl áskeri qalaǵa qarsy shabýyldardy kúsheıtkenin habarlady.
Onyń aıtýynsha, reıdter barysynda myńnan astam palestınalyq ustalyp, úıler qıratylǵan, al áıelder men balalar arasynda qorqynysh pen dúrbeleń oryn alǵan.
Kamıl bul shabýyldardyń 27 qańtardan beri júrgizilip kel jeatqan operatsııanyń bóligi ekenin atap ótti.
- Maqsat – halqymyzdyń erik-jigerin muqatý, – dedi ol.
Gýbernator halyqaralyq qaýymdastyqqa, BUU men adam quqyqtaryn qorǵaý uıymdaryna úndeý jasap, Izraıldiń shabýyldaryn toqtatyp, Palestına halqyn qorǵaýǵa shaqyrdy.
Týlkarmda eki ızraıldik áskerı jaraqattanǵannan keıin, Izraıl armııasy qalany qorshaýǵa alyp, palestınalyq ondaǵan jasty ustap, úılerin tintidi.
Resmı palestınalyq WAFA agenttiginiń málimetinshe, Izraıl kúshteri Týlkarmnyń ońtústik jáne shyǵys kireberisterindegi temir qaqpalardy jaýyp, sonymen qatar Djebbar kópiri men Annab baqylaý beketin jaýyp, kólik qozǵalysyn bógegen.
Izraıl áskeri qala ortalyǵyndaǵy dúkender men kafelerge reıd jasap, ishindegi adamdar men kólikterdegi jolaýshylardy ustap, olardy Hadýrı baqylaý beketine kolonnamen aparǵan.
Sonymen qatar, áskerı kúshter birneshe dúkennen beınebaqylaý jazbalaryn tárkilegen. Qalaǵa qosymsha áskerı tehnıka men býldozerler kirgizilip, ustalǵan jastar oqıǵa ornynda tergep-tekserilgen.
Buǵan deıin Soltústik Batys jaǵalaýdaǵy Týlkarm qalasynda eki ızraıldik áskerı brondalǵan kólikke ornatylǵan jarylǵysh qurylǵynyń jarylýy saldarynan jaraqat alǵany habarlanǵan.
Áskerı málimdemede jarylǵysh qurylǵy operatsııa kezinde iske qosylǵany jáne brondalǵan kóliktiń zaqymdalǵany aıtylǵan. Izraıl armııasy qalany qorshap, blokbeketter ornatqan.
Osyǵan deıin Izraıldiń Iemendegi hýsıtterdiń mańyzdy nysandaryna soqqy jasaǵany týraly jazdyq.