Qazaqstandyq boksshylar Azııa chempıonatyndaǵy altynshy altynyna qol jetkizdi

ASTANA. KAZINFORM – Bokstan Astanada ótip jatqan jastar arasyndaǵy Azııa chempıonatynda Qazaqstan quramasy altynshy altynyna qol jetkizdi.

Naqtyraq aıtsaq, 54 kelide óner kórsetken Aıajan Sydyq fınalda úndistandyq qarsylasyn qapy qaldyryp, el quramasyna alǵashqy altyn júldeni syılasa, erler arasynda 60 keli salmaqta Alekseı Havantsev fınalda úndistandyq Sagar Djahar jeńip, chempıon atandy. 71 keli salmaqta Óner Seıilhan, 60 kelide Tolǵanaı Qasymhan, 57 kelide Aıajan Ermek óz salmaqtarynyń úzdigi atanyp, Azııa chempıony boldy.

Sonymen qatar osyǵan deıin habarlaǵanymyzdaı, erler arasynda 67 kelide el namysyn qorǵaǵan otandasymyz Tórehan Sabyrhan da fınaldyq aıqasta Mýhammadazızbek Ismaılovty (Ózbekstan) 2 márte nokdaýnǵa túsirip, kúmánsiz jeńiske qol jetkizdi.

Ol osyǵan deıin 2021 jyly 52 keli salmaqta, 2022 jyly 57 keli salmaqta jasóspirimder arasynda Azııa chempıony atansa, 2023 jyly 63,5 keli salmaqta bas júldeni qanjyǵasyna baılaǵan. Mine, bıyl taǵy da 67 kelide jastar arasynda top jaryp otyr.

Osylaısha Tórehan Sabyrhan aǵasy Mahmudtyń jasóspirim jáne jastar arasynda ótken Azııa chempıonatyndaǵy kórsetkishterinen asyp tústi.

Mahmud Sabyrhan 2017, 2018 jáne 2019 jyldary qatarynan úsh ret sary qurlyq dodasynda top jarǵan bolatyn.