Izraıl áskeri Lıvannyń ońtústigin artıllerııamen atqylady
ASTANA. KAZINFORM – Izraıl áskeri Lıvannyń ońtústigindegi eldi mekenderdi artıllerııadan atqylap, turǵyn aýdandarda jarylystar jasady, dep habarlaıdy Anadolu.
Izraıl óńirdegi qoldanystaǵy bitimge jáne Lıvanǵa da qatysty AQSh pen Iran arasyndaǵy ýaǵdalastyqtarǵa qaramastan, Lıvanǵa shabýyldaryn jalǵastyryp keledi.
Lıvannyń resmı NNA agenttiginiń málimetinshe, Izraıl áskeri án-Nabatııa provıntsııasyndaǵy Talýsa men Markaba eldi mekenderiniń mańyn artıllerııadan atqylady. Shabýyldan keıin soqqy jasalǵan aýmaqta órt shyqty.
Sondaı-aq Izraıl áskerı kúshteri Markabadaǵy turǵyn aýdandarda jarylǵysh zattardy qoldanǵany habarlandy. Eldi mekende birinen soń biri jarylystar bolyp, aýdan ústine qoıý tútin kóterildi.
Shabýyl tarıhy
2 naýryzda Izraıl áskeri Lıvanǵa jappaı áýe soqqylaryn bastap, eldiń ońtústigindegi birneshe eldi mekendi baqylaýyna aldy.
Lıvan úkimeti osy kezeńde el ishinde qonys aýdarýǵa májbúr bolǵandardyń sany 1 mıllıonnan asqanyn málimdegen edi.
AQSh prezıdenti Donald Tramp 24 sáýirde 17 sáýirden bastap kúshine engen Lıvan men Izraıl arasyndaǵy 10 kúndik ýaqytsha bitim taǵy úsh aptaǵa uzartylǵanyn málimdedi.
14–15 mamyrda AQSh-tyń araǵaıyndyǵymen ótken Lıvan men Izraıl arasyndaǵy kelissózderdiń úshinshi kezeńiniń qorytyndysy boıynsha taraptar 17 mamyrdan bastap atysty toqtatý rejımin 45 kúnge uzartýǵa kelisti.
Keıin Vashıngtonda ótken Izraıl men Lıvan arasyndaǵy tikeleı kelissózderdiń besinshi kezeńinen soń, 26 maýsymda taraptar negizdemelik kelisimge qol qoıdy.
Lıvan Densaýlyq saqtaý mınıstrliginiń sońǵy málimetine sáıkes, 2 naýryzdan beri Izraıldiń shabýyldary saldarynan 4 332 adam qaza tapqan.
Aıta keteıik, buǵan deıin Lıvannyń ońtústiginde Izraıldiń áýe shabýylynan tórt adam qaza tapty.
