Izraıl áskeri Golan syrtyndaǵy Sırııa aýmaǵyna kirdi

ASTANA. KAZINFORM – Izraıl armııasy Golan jotalary aýdanyndaǵy Sırııamen shekaradaǵy býferlik aımaqtan tysqary shyqty. Bul týraly ızraıldik eki sheneýnikke silteme jasap The New York Times (NYT) habarlady, dep jazdy TASS aqparat agenttigi. 

Olardyń pikirinshe, Izraıl áskerleriniń Golannyń syrtyna qaıta ornalastyrylýy Sırııanyń burynǵy prezıdenti Bashar Asadtyń elden ketýine baılanysty jáne bul aımaqtaǵy turaqsyzdyqtyń kúsheıýine ákelýi múmkin.

Basylymnyń málimetinshe, evreı memleketi armııasynyń býferlik aımaqtan tys jerde ekenin Izraıl armııasy Bas shtabynyń bastyǵy Gertsı Halevıdiń Sırııa aýmaǵyna áskerdi ornalastyrý týraly málimdemesi rastady. 

27 qarashada oppozıtsııalyq qarýly toptar Sırııanyń Aleppo jáne Idlıb provıntsııalarynda úkimet pozıtsııalaryna qarsy aýqymdy shabýyl jasady. 7 jeltoqsan kúni keshke olar birneshe iri qalany basyp alyp, kelesi kúni Damaskige kirdi, sodan keıin armııa bólimderi astanadan shyǵyp ketti. Asad Sırııanyń ishki kelissózderinen keıin prezıdenttik qyzmetti bosatyp, elden ketti.
8 jeltoqsan kúni tańerteń Izraıl armııasy Sırııamen shekaradaǵy býferlik aımaqqa óz kúshterin ornalastyratynyn resmı túrde jarııalady.

Premer-mınıstr Benıamın Netanıahý bul áreketter Arab Respýblıkasyndaǵy sońǵy oqıǵalarǵa baılanysty, qorǵanys sıpatynda jáne ýaqytsha shara ekenin túsindirdi.