Izraıl áskeri Gazadaǵy Mekke munarasyn qıratty
ASTANA. KAZINFORM — Qaladaǵy eń bıik ǵımarattardyń biriniń qıraýy aımaqtaǵy gýmanıtarlyq daǵdarystyń jańa belgisine aınaldy, dep habarlaıdy Kazinform agenttiginiń menshikti tilshisi.
Jeksenbi kúni Izraıl qorǵanys kúshteri Gaza qalasynyń batysyndaǵy Rımal men Tal ál-Hava aýdandarynyń shekarasyndaǵy 16 qabatty Mekke munarasyna áýeden shabýyl jasady.
Izraıl áskerıleriniń málimetinshe, ǵımaratty HAMAS sodyrlary paıdalanǵan.
Shabýyl aldynda turǵyndardy evakýatsııalaýǵa buıryq berildi.
Kýágerlerdiń aıtýynsha, kópqabatty ǵımaratta soǵystyń alǵashqy aılarynda baspanasyz qalǵan júzdegen palestınalyq otbasy turǵan.
Ǵımarattyń aınalasynda basqa bosqyndar turatyn ondaǵan shatyr bar. Shabýyldan keıin Rımal tóńireginde qoıý tútin kóterilip, jergilikti dárigerler zardap shekkenderge shuǵyl kómek kórsetti.
Armııa turǵyndardy Gaza sektorynyń ońtústigindegi «qaýipsiz aımaq» dep jarııalanǵan ál-Mavası aımaǵyna qonys aýdarýǵa shaqyrdy.
Alaıda, gýmanıtarlyq uıymdar ál-Mavasıge de birneshe ret oq atylyp, júzdegen beıbit turǵynnyń qaza tapqanyn jáne jaralanǵanyn atap ótti. Bul aımaqtaǵy jaǵdaı óte aýyr: sý, dári-dármek jáne azyq-túlik tapshylyǵy adamdardy tiri qalýdyń shegine ıtermeleıdi.
— Kóp qabatty úıler men tutas aýdandardy qıratý — Gazany turýǵa bolmaıtyn jerge aınaldyratyn kúshtep kóshirý saıasaty, — deıdi Palestına sheneýnikteri men adam quqyqtaryn qorǵaý uıymdary.
Ál-Jazıraǵa silteme jasaǵan medıtsınalyq aqparat kózderine sáıkes, dúısenbi kúni tańerteńnen beri Izraıldiń anklavtaǵy shabýyldarynan 23 adam qaza tapty, onyń 21-i tek Gaza qalasyndaǵy palestınalyqtar.
Gaza sektorynyń densaýlyq saqtaý mınıstrliginiń málimetinshe, 2023 jyldyń qazan aıynan beri qaza tapqandar sany 66 myńnan asty, olardyń kópshiligi áıelder men balalar.
Halyqaralyq baqylaýshylar úzdiksiz bombalaý halyqty medıtsınalyq kómekke qol jetkizýden aıyrǵanyn, aýrýdyń taralýyn týdyrǵanyn jáne asharshylyq qaýpin arttyrǵanyn atap ótti.
Osydan buryn Netanıahý HAMAS múshelerine raqymshylyq jasalýy múmkin ekenin málimdedi.