Izraıl áskeri Gaza sektorynyń ońtústiginde uzyndyǵy 7 km bolatyn týnnel tapty

ASTANA. KAZINFORM – Izraıldiń qorǵanys áskeri (TsAHAL) Gaza sektorynyń ońtústiginen radıkaldardyń uzyndyǵy 7 km bolatyn týnnelin tapty, dep habarlaıdy reseılik TASS.

- Bul gaza sektorynda tabylǵan eń uzyn jáne kúrdeli týnnelderdiń biri. Uzyndyǵy 7 km, tereńdigi 25 metrge jetedi. Týnneldiń ishinde basqarý pýnktterin qosa alǵanda 80 býnker bar. Olardy terrorıstik HAMAS qozǵalysynyń joǵary qolbasshylyǵy qarý saqtaý, uzaq ýaqytqa turaqtaý, Izraıl áskerine qarsy terrorıstik shabýyldardy josparlaýǵa paıdalanǵan,-delingen TsAHAL-dyń baspasóz qyzmeti tartqan aqparatta.

Izraıl áskeriniń málimetterine qaraǵanda, atalǵan týnneldi HAMAS-tyń joǵary qolbasshylarynyń biri, «Rafah» brıgadasynyń komandıri Muhammed Shaban paıdalanǵan.

Baspasóz qyzmeti týnneldiń Mysyr shekarasyna jaqyn mańdaǵy Fıladelfııa dálizine jaqyn jerden, halyq tyǵyz ornalasqan aýdannan qazylǵanyn habarlady. Jerasty joly BUU-nyń Taıaý Shyǵystaǵy palestınalyq bosqyndarǵa kómek jáne jumys jónindegi agenttigi (BAPOR) kesheni, meshit, aýrýhana, mektep pen balabaqshalardy qosa alǵanda kóptegen azamattyq nysandardyń astymen ótedi, dep qosty vedomstvo ókilderi.

Áskerdiń aqparaty boıynsha, týnnelde birneshe jyl boıy 2014 jyly «Qulamaıtyn jartas» operatsııasy kezinde Gazada qaza tapqan jáne radıkaldar urlap ketken Izraıl sarbazy Hadar Goldınniń qaldyqtary jatqan.

Sarbazdyń denesi salynǵan tabyt Gaza sektorynan Izraılge 9 qarasha kúni AQSh prezıdenti Donald Tramptyń beıbitshilik josparynyń birinshi kezeńin júzege asyrý barysynda qaıtarylǵan.

Aıta keteıik, Human Rights Watch uıymy Izraıldi áskerı qylmystar, etnıkalyq tazartý jáne adamzatqa qarsy qylmystar jasady dep aıyptap otyr.