Izraıl armııasy Gazany tolyqtaı basyp alý josparyn bekitti
ASTANA. KAZINFORM — Izraıl Qarýly kúshteri Bas shtabynyń bastyǵy Eıal Zamır Gaza qalasyn basyp alýǵa baǵyttalǵan shabýyl josparynyń «negizgi sheńberin» bekitti, dep jazady Anadoly.
Bul týraly Izraıl armııasynyń resmı habarlamasynda aıtyldy.
13 tamyz kúni tańerteń Izraıl Qarýly kúshteri Bas shtabynyń bastyǵy ishki qaýipsizdik qyzmeti Shın-Bet ókilderimen kezdesip, Gaza qalasyna jasalatyn okkýpatsııalyq operatsııa josparyn talqylaǵan. Sol kezdesýde jospar maquldanǵany habarlandy.
Kezdesý barysynda Izraıl armııasynyń qazirgi operatsııalary men Gazanyń ońtústik-shyǵysyndaǵy Zeıtýn aýdanynda júrgizilgen shabýyldar da sóz boldy.
— Gaza sektoryndaǵy kelesi kezeńderdiń negizgi kontseptsııasy saıası basshylyqtyń nusqaýlaryna sáıkes usynylyp, bekitildi, — delingen málimdemede.
Buqaralyq aqparat quraldarynyń habarlaýynsha, 7 tamyzda Izraıldiń Qaýipsizdik mınıstrler kabıneti otyrysynda Bas shtab bastyǵy Eıal Zamır Gaza sektoryn okkýpatsııalaý josparyna qarsy pikir bildirip, birqatar mınıstrlermen qatty daýlasqan.
8 tamyzda Izraıldiń Qaýipsizdik kabıneti Palestına eksklavynyń soltústiginde ornalasqan Gaza qalasyn okkýpatsııalaý josparyn resmı túrde maquldady.
Izraıl premer-mınıstri Bınıamın Netanıahý Fox News arnasyna bergen suhbatynda Gaza sektoryn tolyqtaı basyp alý nıetin ashyq málimdegen.
Osyǵan deıin halyqaralyq qaýymdastyq Izraıldi Gaza sektoryn basyp alýdy dereý toqtatýǵa shaqyrǵanyn jazǵanbyz.