Izraıl armııasy Gaza sektoryndaǵy HAMAS týnnelderine sý jibere bastady

Izraıl armııasy (TsAHAL) Gaza sektoryndaǵy týnnel jelilerine teńiz sýyn aıdaı bastady. Kazinform bul týraly Wall Street Journal basylymyna silteme jasap habarlaıdy. 

Buǵan deıin Izraıl armııasy Gaza sektoryndaǵy HAMAS týnnel júıelerin teńiz sýyna toltyrý úshin qubyrlar ornatqan. Anklavtyń soltústigindegi «Ash-Shatı» bosqyndar lageriniń mańyna bes qubyr ornatyldy. Qubyrlardyń kómegimen HAMAS týnnelderin Jerorta teńiziniń sýymen birneshe aptada-aq toltyrýǵa bolady.

Izraıl Qorǵanys mınıstrliginiń ókili týnnelderdegi operatsııalar qupııa dep, túsinik berýden bas tartty. Alaıda Wall Street Journal Izraıl armııasynyń operatsııalary jaıly biletin amerıkalyq sheneýnikterge silteme jasaı otyryp, sý aıdaý protsesi bastalǵanyn jáne jerasty ınfraqurylymyn buzý jumystary qarqyndy júrgizilip jatqanyn jazdy.

Esterińizge sala keteıik, TsAHAL-dyń resmı ókili kontr-admıral Danıel Hagarı Izraıl áskeriniń Palestına alańynyń astynan Gaza qalasynyń úlken týnnelder jelisin tapqanyn aıtqan bolatyn.

Sonymen qatar Izraıl men HAMAS arasyndaǵy kepilge alý týraly jańa kelissózder kelesi aptada júrgizilýi múmkin ekeni habarlandy.