Izraıl armııasy eldiń ońtústigindegi barlyq eldi mekendi baqylaýǵa alǵanyn málimdedi

Izraıl armııasynyń ókili dúısenbi kúni tańerteń Izraıl barlyq eldi mekendi baqylap otyrǵanyn jáne qazir munda eshqandaı qaqtyǵys joq ekenin málimdedi. Alaıda ol Izraıl aýmaǵynda áli de HAMAS sodyrlary bar ekenin moıyndady. Kazinform agenttiginiń tilshisi bul týraly The Times of Israel basylymyna silteme jasap habarlaıdy. 

Izraıl qorǵanys kúshteriniń (TsAHAL) bas ókili kontr-admıral Danıel Hagarı Izraıl áskerleriniń Gaza sektorymen shekaralas barlyq eldi mekenderdi baqylaýǵa alǵanyn aıtty.

Onyń aıtýynsha, sońǵy birneshe saǵatta áskerıler men palestınalyq lańkester arasyndaǵy qaqtyǵys oqıǵalary kóp bolǵan joq. Hagarı áskerıler Shaar Hanege aımaqtyq keńesinde úsh, Beerde bir, Holıt pen Sýfada bes jáne Alýmımde taǵy tórt lańkesti óltirgenin aıtty.

«Bul aımaqta lańkester áli de bolýy ábden múmkin», - dedi Hagarı.

Málimdemege sáıkes, qazir eshbir qalada qaqtyǵys bolyp jatqan joq. Gaza sektoryndaǵy shekaralyq tosqaýyl tankter, shabýyl tikushaqtary jáne ushqyshsyz ushaqtarmen fızıkalyq túrde qorǵalatyn bolady. Izraıl armııasy Gaza sektory shekarasyndaǵy 24 qalanyń 15-in evakýatsııalady, qalǵandaryn aldaǵy kúni kóshirýdi jalǵastyrady. Onyń aıtýynsha, bul kezeńde Sderot qalasynyń turǵyndary evakýatsııalanbaıdy.

Senbi kúni tańerteń áskerı is-qımyldar bastalǵannan beri Izraılge 4 400-deı zymyran atyldy. Sondaı-aq TsAHAL 48 saǵat ishinde 300 myń rezervıst jınaǵanyn habarlady.