Izraıl Al Jazeera telekompanııasynyń bes qyzmetkerin óltirdi
ASTANA. KAZINFORM — Al Jazeera tilshisi Anas ál-Sharıf pen onyń tórt áriptesi Gaza qalasynda ızraıldik kúshterdiń qolynan qaza tapty, dep habarlaıdy BBC.
Habarlamaǵa sáıkes, shabýyl kezinde telekompanııanyń bes qyzmetkeri Gazadaǵy ash-Shıfa aýrýhanasynyń kire berisindegi shatyrda bolǵan.
Izraıl áskeri shatyrǵa soqqy berilgenin rastap, onyń Anas ál-Sharıfke baǵyttalǵanyn málimdedi.
Izraıl áskerıleriniń aıtýynsha, ózin jýrnalıst retinde tanytqan Anas shyn máninde qarýly toptardyń múshesi bolǵan.
Izraıldikter beıbit turǵyndardyń shyǵynyn barynsha azaıtý úshin ártúrli barlaý málimetteri men joǵary dáldiktegi qarýlar qoldanyldy dep ózderin aqtaýǵa tyrysty. Alaıda olardyń zymyranynan barlyǵy 7 adam qaza tapty.
Al Jazeera óz qyzmetkerlerine jasalǵan shabýyldy «baspasóz bostandyǵyna jasalǵan óreskel jáne qasaqana shabýyl» dep sıpattady. Telkompanııanyń bas redaktory Muhammed Mýavad ál-Sharıftiń akkredıttelgen jýrnalıst ekenin jáne onyń arqasynda búkil álem Gaza sektorynda shynymen ne bolyp jatqanyn bilgenin aıtty.
Izraıl sheteldik jýrnalısterdi Gazaǵa kirgizbeıdi, sondyqtan kóptegen aqparat quraldary jergilikti tilshilerdi jaldaıdy.
28 jastaǵy Anas ál-Sharıf qaıtys bolmas buryn áleýmettik jelide Izraıldiń Gazanyń shyǵysy men ońtústigin úzdiksiz bombalap jatqany týraly jazǵan bolatyn.
Eske sala keteıik, halyqaralyq qaýymdastyq Izraıldi Gaza sektoryn basyp alýdy dereý toqtatýǵa shaqyrdy.