Izraıl 60 kúndik bitimge kelýdiń sharttarymen kelisti – Tramp

ASTANA. KAZINFORM – AQSh prezıdenti Donald Tramp Vashıngton ókilderimen kezdesýinde Izraıl Gaza sektorynda eki aılyq atysty toqtatýǵa qajetti sharttarmen keliskenin aıtty, dep habarlaıdy VVS.

– Búgin ókilderim ızraıldiktermen Gaza máselesi boıynsha uzaq ári nátıjeli kezdesý ótkizdi. Izraıl 60 kúndik bitimge kelýdiń qajetti sharttarymen kelisti. Osyǵan oraı biz barlyq tarappen soǵysty toqtatý úshin jumys isteımiz, - dep jazdy ol Truth Social áleýmettik jelisinde.

AQSh basshysy jazbasynda biraq onyń naqty qandaı sharttar ekenin naqtylaǵan joq.

Amerıka kóshbasshysynyń aıtýynsha, «beıbitshilik ornatý úshin kóp eńbek etken» Qatar men Mysyr ókilderi keıingi usynysty HAMAS sodyrlaryna jetkizedi. 

– Taıaý Shyǵystyń ıgiligi úshin HAMAS bul kelisimdi qabyldaıdy dep úmittenemin, - dep qosty Tramp. 

Buǵan baılanysty HAMAS ókilderi ázirge túsinik bergen joq. 

Amerıkalyq BAQ osyǵan deıin Izraıldiń strategııalyq josparlaý mınıstri Ron Dermerdiń Vashıngtonǵa kelgenin, ol Aq úı ókilderimen Gaza sektory men Irandaǵy jaǵdaıdy, sondaı-aq Izraıl premer-mınıstri Bınıamın Netanıahýdyń AQSh-qa saparyn talqylaýy tıis bolǵanyn habarlaǵan. 

Tramp seısenbide Netanıahý Gazadaǵy shaıqastardyń toqtatylýyn qalaıtynyn jetkizgen.

Aıta keteıik, Izraıldiń Gaza sektoryna jasaǵan soqqysynan barlyǵy 95 palestınalyq qaza tapqany habarlandy. Jeksenbi kúni AQSh prezıdenti Izraıl men HAMAS-ty Gaza sektorynda atysty toqtatýǵa shaqyrdy. 

Osyǵan deıin Tramptyń AQSh-tyń Sırııaǵa qarsy sanktsııalaryn alyp tastaǵanyn jazǵan edik.