Izmırde sý daǵdarysy kúsheıdi

ASTANA. KAZINFORM — Túrkııanyń Izmır aımaǵyndaǵy sýdy kóp tutynatyn aımaqtarda osy aptada sýdy qysqartý bastalady, dep habarlaıdy IZSU. 

IZSU (Izmır sý jáne káriz basqarmasy) bergen aqparatqa sáıkes, 6 tamyzǵa qaraǵan túnnen bastap 6 saǵatqa sý sóndiriledi. Halyqqa úzilisten zardap shekken oramdar men aýdandar týraly qosymsha aqparat berý josparlanyp otyr.

Izmırdegi qurǵaqshylyq pen sý resýrstarynyń azaıýyna baılanysty Cheshme aımaǵynda bastalǵan sýdyń toqtatylýy endi qala ortalyǵynda jalǵasatyny habarlandy.
Qalanyń aýyz sý qajettiliginiń edáýir bóligin óteıtin sý qoımasyndaǵy sý qory barynsha azaıyp, Gordes sý qoımasynan sý múldem tartylmaı jatqany aıtyldy. IZSU málimetteri boıynsha, qurǵaqshylyq saldarynan jer asty sýlarynyń kózderi (uńǵymalar) de tıimdiligin aıtarlyqtaı joǵaltty.

Málimdemede Izmırde kúnine 700 myń tekshe metr sý tutynylatyny habarlandy. Sýdy baqylaýda ustaý úshin sý qoımalaryndaǵy aýyz sý qory jańbyrly maýsymǵa jetýi úshin keshki ýaqytta sýdy úzý qajet ekeni aıtyldy.

Sýdy kóp tutynatyn aýdandarda turǵyndardyń ómirine barynsha az áser etý úshin 6 tamyzdan bastap kún saıyn saǵat 23:00–den 05:00–ge deıin ishinara sýdy toqtatý josparlanǵan.

Eske sala keteıik, 2100 jylǵa qaraı bir mıllıardqa jýyq adam aýyz sý tapshylyǵyna tap bolýy múmkin.