Izmırde 6 tamyzdan bastap túngi ýaqytta sý berý toqtatylady

ASTANA. KAZINFORM – Izmırde sý daǵdarysy ýshyǵyp barady. Qalada túngi ýaqyttarda sý toqtatylyp jatyr, dep habarlaıdy Kazinform tilshisi.

Izmır bıligi qurǵaqshylyq pen sý resýrstarynyń kúrt azaıýyna baılanysty sý berýdi ýaqytsha toqtatqanyn habarlady. Izmır sýmen jabdyqtaý jáne kanalızatsııa bas basqarmasy (İZSU) 6 tamyzdan bastap tutynýy kóp aımaqtarda túngi ýaqytta sýdy úzý bastalatynyn habarlady. 

Resmı málimdemege sáıkes, qysqartýlar kún saıyn saǵat 23:00-den 05:00-ge deıin júrgizilip, jaýyn-shashyn maýsymy bastalǵanǵa deıin jalǵasady. Sharanyń maqsaty – qalǵan sý qoryn únemdeý jáne halyqty uzaq merzimdi perspektıvada aýyz sýmen úzdiksiz qamtamasyz etý. 

İZSU qalanyń úlken bóligin qamtamasyz etetin negizgi Taftaly sý qoımasyndaǵy sý deńgeıi eń tómengi deńgeıge jetkenin atap ótti. Taǵy bir negizgi kózden, Górdes sý qoımasynan sý berý tolyǵymen toqtatyldy. Sonymen qatar qatty qurǵaqshylyq saldarynan jerasty sý uńǵymalarynyń ónimdiligi kúrt tómendedi. 

Búginde Izmırde ortasha táýliktik sý tutyný shamamen 700 myń tekshe metrdi quraıdy. Bılik shekteý sharalary engizilmese, qalanyń sý qubyryna qaýip tónýi múmkin ekenin eskertedi. 

Al, aldaǵy kúnderi shekteý engiziletin aýdandar men shaǵyn aýdandardyń tizimi jarııalanady. 

Mýnıtsıpalıtet turǵyndardy sýdy utymdy jáne únemdi tutynýǵa shaqyrady jáne klımattyń ózgerýi men sý tapshylyǵynyń ósýi jaǵdaıynda tabıǵı resýrstarǵa qamqorlyq jasaý kerektigin eske salady. 

Buǵan deıin Túrkııadaǵy ınflıatsııa 33,5%-ǵa deıin baıaýlaǵanyn jazǵan edik.