Izmır áýejaıy orman órtine baılanysty jumysyn ýaqytsha toqtatty

ASTANA. KAZINFORM — Túrkııanyń Izmır qalasyndaǵy halyqaralyq áýejaı provıntsııa aýmaǵynda jalǵasyp jatqan orman órtterine baılanysty reısterdi qabyldaýdy jáne jiberýdi ýaqytsha toqtatty, dep jazady TASS.

Milliyet gazetiniń málimetinshe, Adnan Menderes atyndaǵy áýejaı órt oshaǵyna jaqyn ornalasqan Gazıemır aýdanynda ornalasqan. Jalǵasyp jatqan orman órti, tútindený jáne órt sóndirý ushaqtarynyń jumysyna baılanysty áýejaı ushaqtardy qabyldaýdy jáne ushyrýdy ýaqytsha toqtatty. Izmırge baǵyttalǵan keıbir reıs ózge áýejaılarǵa baǵyttaldy. Órt baqylaýǵa alynǵannan keıin reısterdiń jumysy qalypty rejımde qaıta jalǵasady dep kútilip otyr.

Áýejaıdyń onlaın-tablosynda keıbir josparlanǵan reıstiń keıinge shegerilgeni, kóptegen reıstiń múldem toqtatylǵany kórsetilgen.

Buǵan deıin Izmır provıntsııasynyń gýbernatory Súleımen Elban provıntsııanyń úsh aýdanynda iri orman órtteri tutanǵanyn habarlaǵan bolatyn. Turǵyn úılerge jaqyn ornalasqan birneshe aýdan evakýatsııalanǵan. Órtti sóndirýge 1 100 órt sóndirýshi, 6 ushaq, 23 sý tasýshy kólik pen býldozer jumyldyrylǵan. Alaıda jeldiń jyldamdyǵy saǵatyna 70-ten 117 shaqyrymǵa deıin jetip, bul órt sóndirý avıatsııasynyń jumysyn qıyndatyp, sý shashýdy turaqty túrde júrgizýge múmkindik bermeı otyr.

Buǵan deıin Túrkııanyń soltústik-batysynda aýqymdy orman órtteri bastalǵanyn jazǵanbyz. Birneshe kúnniń ishinde 150-den astam órt shyǵyp, júzdegen adam qaýipsiz jerge kóshirildi.