Іzdeýde júrgen tórt qylmysker elordada quryqtaldy
ASTANA. Sáýirdiń 15-i. QazAqparat /Marlan Jıembaı/ - «Mıgrant» jedel aldyn alý is-sharasynyń ekinshi kúninde Astana qalalyq ІІD krımınaldyq polıtsııa qyzmetkerleri izdeýde júrgen tórt qylmyskerdi quryqtady.
Bul týraly atalǵan vedomstvonyń til saıasaty jáne aqparat bóliminen habarlady.
Eki kúnniń ishinde kósh-qon polıtsııasynyń qyzmetkerleri 448 sheteldik azamatty ákimshilik jaýapkershilikke tartsa, olardyń 56-sy ákimshilik sottyń sheshimimen el aýmaǵynan shyǵarylǵan. 261 sheteldiktiń ýaqytsha kelip-ketý merzimi qysqartylyp, taǵy 101 azamat tulǵasyn anyqtaý maqsatynda Іshki ister departamentiniń qabyldaý-taratý ornyna qamalǵan. Sondaı-aq kóshi-qon zańnamasyn buzǵan elimizdiń 154 azamaty ákimshilik jaýapkershilik tartylǵan, onyń 4-eýi sheteldik jumys kúshterin zańsyz paıdalanyp kelgen.
«Mıgrant» jedel aldyn alý is-sharasynyń barysy Astana qalalyq ІІD basshylyǵynyń erekshe baqylaýynda.
Aıta keteıik, qazirgi ýaqytta Qyrǵyzstan men Tájikstan azamattary memlekettik shekarany kesip ótken kúnnen bastap 5 kúnniń ishinde ishki ister organdarynda tirkelýi qajet. Buǵan deıin atalǵan elderdiń azamattaryna QR Іshki ister mınıstrligi, Ulttyq qaýipsizdik komıteti jáne Syrtqy ister mınıstrlikteriniń shekaralyq baqylaý beketteri arqyly ótken sheteldik azamattardy tirkeý erejesin bekitý týraly birlesken buıryǵyna sáıkes tirkeý protsedýralary jeńildetilgen bolatyn. Máselen Qazaqstan aýmaǵynda Qyrǵyzstan azamaty ishki ister organdarynda tirkelmeı-aq 90 kún, al Tájikstan azamattary 30 kún júre alatyn.
