Іzdeýde júrgen Reseı azamaty ustaldy - ІІM
ASTANA. Qańtardyń 27-si. QazAqparat /Arman Asqarov/ - Oral qalasyndaǵy jaldamaly páterdiń birinde izdeýde júrgen Reseı azamaty ustaldy. Ol Tolıattı qalasynda zeınet jasyndaǵy adamdy óltirgen.
Bul týraly búgingi brıfıng barysynda QR ІІM Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Búginde qandyqol qylmyskerdiń 80-shi jyldary qaraqshylyqpen aınalysqany anyqtalyp otyr. 1997 jyldan beri ony Reseı Federatsııasy Saratov oblysynyń quqyq qorǵaýshylary izdeý ústinde.
Al Ýkraınanyń elordasy - Kıev qalasynda Qostanaı oblysynyń 27 jastaǵy turǵyny ustaldy. Ol 2005 jyldyń tamyz aıynda Almaty oblysynyń Jambyl aýdanynda kisi óltirgeni úshin izdeý jarııalanǵan. Mınsk konventsııasy boıynsha ony Qazaqstanǵa ekstradıtsııalaý máselesi sheshilýde.
