Іzdeýde júrgen qazaqstandyq bankır Ózbekstan tólqujatymen saıahattaǵan
ASTANA. QazAqparat - Jeti jyldan beri halyqaralyq izdeýde júrgen qazaqstandyq bankır Ózbekstannyń tólqujatymen saıahattap kelgen, dep habarlaıdy alau.kz.
2010 jyly Shymkent turǵyny, ekinshi deńgeıli banktiń burynǵy dırektoryna 590 mıllıon teńge jymqyrǵany úshin halyqaralyq izdeý jarııalanǵan edi. Ol polıtsııadan túrli elderde jasyrynyp kelgen. Shymkentte onyń jubaıy men eki balasy qalǵan. Osy ýaqytqa deıin onyń otbasy da, ózi de aqshadan tarshylyq kórmeı kelgen.
Onyń tólqujatyna qoıylǵan túrli elderdiń mórtabany mıllıoner-bankırdiń tek ushaqpen saıahattaǵanyn kórsetti. 23 naýryz kúni ol tanysymen birge «Infiniti» jeńil avtomobılimen Reseı shekarasyn kesip ótedi. Al, qazaqstandyq shekara qyzmetiniń qyzmetkerleri onyń tólqujatynan kúdiktenedi. Qujat Ózbekstan azamaty Maqsat Aımatovtyń atyna jasalǵan. Onyń ishinde tek bir-eki beti bos bolsa, al qalǵan betteri sheteldik shekara mórtabandarymen toltyrylǵan. Keıin anyqtalǵandaı, onyń qujaty jalǵan, al esimi shynaıy emes bolyp shyqty.
Kúdikti azamatty saýsaq izi boıynsha daktıloskopııalyq esep arqyly teksergen Qostanaı oblystyq ІІD ókilderi onyń izdeýde júrgen shymkenttik mıllıoner, burynǵy bank dırektory ekendigi anyqtady. Birneshe kúnnen keıin atalmysh is boıynsha barlyq materıaldar, ıaǵnı jalǵan Ózbekstan azamaty Maqsat Aımatovtyń barlyq derekteri Shymkent qalalyq polıtsııa qyzmetkerlerine berildi.
