Іzdeýde júrgen atbasarlyq qylmysker 7 jyldan keıin Reseıde qolǵa tústi
KÓKShETAÝ. QazAqparat - Osydan 7 jyl buryn adam óltirgeni úshin kúdikke alynǵan, keıin boı tasalap júrgen Atbasardyń 60 jastaǵy turǵyny Reseı Federatsııasynyń aýmaǵynan ustaldy, dep habarlaıdy QazAqparat tilshisi Aqmola oblysynyń PD baspasóz qyzmetine silteme jasap.
«Reseı Federatsııasy aýmaǵynda jasyrynyp júrgen qylmyskerlerdi izdestirý boıynsha qolǵa alynǵan birlesken sharalardyń nátjesinde Aqmola oblysynyń polıtseıleri Reseıdiń Krasnodar aımaǵy boıynsha ÝÝR ÝMVD qyzmetkerlerimen birlesip, adam óltirgen 60 jastaǵy kúdiktini Apsheronsk qalasynyń aýmaǵynan anyqtap, ustady», - deıdi vedomstvodan.
Belgili bolǵandaı, 2012 jyldyń naýryz aıynda er adam óziniń áıelin óltirip, quqyq qorǵaý organdarynan qashyp ketken. Polıtsııa qyzmetkerleri bir jarym jyl boıy kúdiktini ustaýǵa tyrysqan. 2013 jyldyń jeltoqsan aıynda kúdiktige memleketaralyq izdeý jarııalandy.
«Anyqtalǵandaı, kúdikti 7 jyl boıy jalǵan qujatpen Reseı Federatsııasy aýmaǵyndaǵy týystarynyń úıinde turyp kelgen. Qazirgi kezde kúdikti Reseıdiń Krasnodar aımaǵy boıynsha ÝÝR ÝMVD ýaqytsha ustaý oqshaýlaǵyshyna qamaldy jáne ony ekstradıtsııalaý máselesi qaralýda», - dep tolyqtyrdy vedomstvodan.
Jyl basynan beri Aqmola oblysynyń tártip saqshylary erterekte jasalǵan 87 qylmystyń betin ashty.
