Іzdeý jarııalanǵan túrkistandyq tórt jasóspirim Petropavldan tabyldy
PETROPAVL. QazAqparat – Túrkistan oblysynyń óz betimen júrgen tórt jasóspirimin Petropavl polıtseıleri qaladan tapty. Olar eshkimdi eskertpesten úılerinen ketip, «el aralaýǵa shyqqan» eken, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, polıtseıler Túrkistan oblysynyń 16 jastaǵy turǵynyn Pestroe kóliniń mańynan tapqan. Jasóspirimniń joǵalǵany týraly Shymkent qalasynda turatyn onyń anasy habarlaǵan. Keıin bozbalanyń ózi sııaqty kámeletke tolmaǵan úsh balamen birge eldi aralaýǵa shyqqany belgili boldy.
«Tórteýi de kámeletke tolmaǵandardy beıimdeý ortalyǵyna jetkizildi, ata-analaryna olardyń júrgen jeri týraly habarlandy. Jasóspirimderdiń tarapynan, sondaı-aq olarǵa qatysty jasalatyn quqyq buzýshylyqtardy azaıtý úshin polıtseıler ata-analardy balalaryna barynsha kóńil bólýge, olardyń bos ýaqyttarynda nemen aınalysatynyn, kimmen júretinin qadaǵalaýǵa shaqyrady», - deıdi Petropavl qalasynyń PB jergilikti polıtsııa qyzmeti bóliminiń bastyǵy Rýstam Sadýlov.
Shildeniń 15-i men 19-y aralyǵynda Petropavl qalasynda ıývenaldyq polıtseıleri «Qaýipsiz jaz» aktsııasyn ótkizdi. Tártip saqshylary turmysy qolaısyz otbasylardy tekserip, jazǵy lagerlerde profılaktıkalyq áńgimeler júrgizdi. Sondaı-aq, jastardyń júretin jerleri - kóńil kóterý oryndaryn, kompıýterlik klýbtardy tekserdi. Reıdter kezinde jasóspirimderge sýǵa túsý, beıtanys adamdarmen sóılesý erejeleri, alaıaqtyq týraly jadynamalar taratyldy. Aktsııa barysynda Petropavldyń 7 turǵyny balalarynyń túngi ýaqytta kóshede jalǵyz júrgeni úshin jaýapqa tartyldy.
