Іzdeý salynǵan qostanaılyq qyz Astanadan tabyldy
QOSTANAI.QazAqparat - 16 qańtardan bastap izdeý salynǵan Qostanaı oblysynyń turǵyny astanalyq polıtseılerdiń kómegimen tabyldy, dep habarlaıdy QazAqparat tilshisi Astana qalalyq Polıtsııa departamentiniń baspasóz qyzmetine silteme jasap.
Astananyń polıtsııa qyzmetkerleri keshki ýaqytta syrt kıimsiz júrgen qyzdy tekserdi.
«Tekserý kezinde onyń 26 jastaǵy Sabına Júnisbekova ekenin anyqtady. Ol 16 qańtar kúni saǵat 21: 00-de úıinen shyǵyp, dárihananyń mańynan ótip bara jatqan áıel adamǵa sómkesin tastap, ózi belgisiz baǵytqa ketip qalǵan. Sómkeni alǵan áıel ne isteý kerektigin bilmeı, ony jaqyn jerdegi dárihanaǵa aparyp, farmatsevtke qaldyrǵan. Keıin qyzdyń týystary onyń telefonyna qońyraý shalyp, bolǵan oqıǵany bilip, dárihanadan zattaryn alyp ketken», - dep habarlady vedomstvonyń baspasóz qyzmeti.
Sol kúni qyz Astana qalalyq aýrýhanasyna jetkizildi. Ákesi Murat Júnisbekov qyzynyń mekenjaıy týraly bilgennen keıin, elordada turatyn aǵasyna habarlady.
Taǵy bir aıta keterligi, aýrýhanaǵa jetkizilgen qyz sońǵy birneshe kúnde ne bolǵanyn bilmeıdi.
