Іz-túzsiz joǵalǵandardyń balalaryna tólemaqy taǵaıyndaý máselesi talqylanýda
ASTANA. QazAqparat - QR Parlamentinde iz-túzsiz joǵalǵandardyń asyraýyndaǵy balalary men týystaryna tólemaqy taǵaıyndaý máselesi talqylanýda. Mundaı usynys QR Parlamenti Senatynda ótken «Habar-osharsyz ketken azamattardy izdestirý boıynsha quqyq qorǵaý organdarynyń qyzmetin normatıvtik quqyqtyq retteýdiń jaı-kúıi men máseleleri» atty dóńgelek ústelde aıtyldy, dep habarlaıdy QazAqparat.
«Jedel-izdestirý qyzmetiniń júrgizilýimen qatar, iz-túzsiz ketken azamattardyń jáne olardyń týǵan-týystarynyń quqyǵyn qamtamasyz etý máseleleri de nazardan tys qalmaýy tıis. Máselen, habar-osharsyz ketken tulǵanyń asyraýyndaǵy azamattarǵa Parlament Májilisiniń qaraýyndaǵy «Jábirlenýshilerge zııandy óteý qory týraly» zań jobasy aıasynda qurylǵaly jatqan jábirlenýshilerge zııandy óteý qory arqyly quzyrly organnyń sheshimimen tólemaqy taǵaıyndalǵany jón bolar edi. Іz-túzsiz joǵalyp ketken ata-analardyń kámelettik jasqa tolmaǵan balalaryna izdeý bastalǵan kúnnen bastap, ýaqytsha qamqorshyǵa berý máselesi de sheshimin tabýy kerek. Ata-ana kóz jumǵandyǵy rastalmaıynsha, olardy asyrap alý múmkindigi qarastyrylmaıdy», - dedi QR Parlamenti Senaty tóraǵasynyń orynbasary Bektas Beknazarov.
Aıta ketý kerek, Qazaqstan Bas prokýratýrasynyń bergen málimetterine sáıkes, sońǵy úsh jylda quqyq qorǵaý organdarymen 13 749 iz-túzsiz joǵalyp ketken azamat izdestirilgen. Qolǵa alynǵan sharalardyń nátıjesinde olardyń 8515-i tabylǵan. 2016 jyly 1554 adam habar-osharsyz ketken jáne áli kúnge deıin izdeýde júr.
B. Beknazarovtyń aıtýynsha, adamdardyń joǵalýy negizinen qylmysqa baılanysty bolyp jatady.
«Bizdiń Konstıtýtsııasynda: eń basty qundylyq - ol adam jáne onyń ómiri, bostandyǵy ekendigi kórsetilgen. Al endi sol adam myńdap, tipti onmyńdap joǵalyp jatqan bolsa, onyń taǵdyry eshkimge beımálim qalatyn bolsa, tabylmaı qalatyndar bolsa, bul - qoǵamda úlken problema bar ekendigin kórsetedi. Bul problema tezirek sheshilýi kerek ekendigin kórsetedi», - dedi senator.
