Іz-túzsiz joǵalǵan SQO turǵynyn úsh aı boıy izdep jatyr
PETROPAVLOVSK. QazAqparat – Soltústik Qazaqstan oblysynda jyl basynan beri 90 adamǵa izdeý jarııalandy. Polıtseıler olardyń 67-sin tapty, dep habarlaıdy QazAqparat.
Polıtsııa departamenti baspasóz qyzmetiniń málimetinshe, eriktilerdiń qatysýymen joǵalǵan 260 adam birinshi táýlikte tabylǵan.
«Petropavlda jyl basynan beri 27 adamǵa izdeý jarııalandy. Olardyń 26-sy tabyldy. Al 28 tamyzda habar-osharsyz ketken 81 jastaǵy zeınetker Nadejda Agafonova áli tabylǵan joq. Polıtsııa bólimsheleriniń kezekshi bólimderine izdeý qaǵazdary ilinip, departamenttiń áleýmettik jelilerinde jarııalanǵan», – dep habarlady baspasóz qyzmeti.
Egde jastaǵy áıel tańǵy saǵat 8:00 shamasynda úıinen shyǵyp, «Jıgýlı» degen jerdegi saıajaıǵa ketken. Onyń ornalasqan jeri áli belgisiz. Umytshaqtyq aýrýyna shaldyqqan. Erekshe belgileri: aryqsha kelgen, boıy shamamen 160-165 sm, shashyn aq shalǵan, qysqa, kóziniń túsi sur. Qara shalbar, kúreń barqyt jempir kıgen, basyna shymqaı kók oramal taqqan.
Polıtseıler bul áıeldiń ornalasqan jerin biletin adamdar bolsa, 102-ge habarlasýlaryn suraıdy.
