Іz-túzsiz joǵalǵan er adamdy qaryzyn qaıtarǵysy kelmegen tanysy óltirgen
14 naýryz kúni túngi saǵat 23:00 shamasynda Túrkistan oblysy Saıram aýdandyq polıtsııa basqarmasyna jergilikti áıel turǵyn kúıeýiniń iz-túzsiz joǵalǵany týraly habarlaǵan. Saıramdyq saqshylar joǵalǵan azamatty izdeýge birden kirisken. Jan-jaqqa baǵyttamalar berilip, aýdandyq polıtsııa basqarmasynyń jeke quramy jumyldyryldy. Aýdandaǵy taksı júrgizýshilerinen jáne kórýi múmkin degen turǵyndardan suraq-jaýap alyndy.
Atqarylǵan aýqymdy jumystyń nátıjesinde aýdan polıtseıleri kúdiktiniń izine túsken. Ol joǵalǵan azamattyń tanysy, Saıram aýdany, Qaramurt aýylynyń turǵyny. Kúdikti óz kinásin moıyndamaı, jaýaptan jaltarýǵa tyrysqan.
«Alaıda polıtseıler dálelder men aıǵaqty zattardy jınaqtap, joǵalǵan azamat óziniń «BMV» kóligin tastap, tek osy kúdiktimen jolyqqanyn jáne kúdiktiniń kóligine otyryp ketkenin tolyǵymen dáleldedi. Osydan soń kúdikti óz kinásin tolyq moıyndady», - dedi polıtsııadan.
Tekserý barysynda belgili bolǵandaı, joǵalǵan azamat óz tanysynan iri kólemdegi aqshasyn alý úshin jolyqqan. Kúdiktiniń kóligine otyryp, jolda ketip bara jatqanda ekeýiniń arasynda daý-janjal týyndaǵan. Saldarynan qaryzdy qaıtarǵysy kelmegen kúdikti er azamatty býyndyryp óltirgen. Qylmys izin jasyrý maqsatynda denesin karerdiń mańyna kómip tastaǵan.
«Kúdikti er azamat qamaýda. Ol buryn sotty bolmaǵan. Oǵan qatysty QR QK-niń 99-baby 1-bóligimen («Adam óltirý») sotqa deıingi tergep-tekserý jumystary júrgizilýde. Іstiń tolyq mán-jaıy tergeý barysynda anyqtalatyn bolady», - dep tolyqtyrdy polıtsııadan.