Іz-túzsiz joǵalǵan áıel ólimine kúdiktiler ustaldy - Túrkistan oblysy
MAQTAARAL. QazAqparat - Maqtaaral APB krımınaldyq polıtsııa qyzmetkerleri buryn habar-osharsyz ketken jas áıeldiń ólimin ashty, dep habarlaıdy QazAqparat Túrkistan oblysy PD baspasóz qyzmetine silteme jasap.
Kúdikti retinde tólem termınaldarynan aqsha urlaýǵa qatysy bar eki jergilikti turǵyn ustaldy. Tergeý barysynda jastar paıdakúnemdik maqsatta aýyr qylmys jasaǵanyn moıyndady.
Aǵymdaǵy jyldyń qyrkúıek aıynyń basynda Maqtaaral APB kezekshi bólimine jergilikti turǵyn jumysynan keıin úıine oralmaǵan sińlisiniń habar-osharsyz joǵalyp ketkeni týraly aryzdanady. Polıtseıler anyqtaǵandaı, jas áıel dúkende satýshy bolyp jumys istegen, otbasynda eshqandaı janjal bolmaǵan.
Atalǵan jaıtty polıtsııa qyzmetkerleri Maqtaaral APB-da tirkep, birden habar- osharsyz ketken adamdy izdeýge kirisedi. Ony izdeýge Maqtaaral APB-niń barlyq jeke quramy, barlyq polıtsııa bólimshelerine habar-osharsyz ketken áıeldiń belgileri bar málimetter jiberilgen. Tártip saqshylary jaqyn mańdaǵy aýmaqtardy aralap, týystary men kýágerlerimen suhbattasyp, onyń tanystaryn, sondaı-aq beınebaqylaý kameralaryn tekserdi.
Úsh aptadan keıin jergilikti kanaldardyń birinde polıtsııa belgisiz áıeldiń máıiti men kıimin tapty. Alǵashqyda aldyn-ala tekserý kezinde jabaıy ańdardan zardap shekken máıitti jáne ólimniń sebebin anyqtaý múmkin bolmady. Jedel ýákilder men krımınalıster jábirlenýshiniń jeke basyn anyqtaý úshin muqııat jumystardy júrgizdi. Polıtseıler máıittiń buzylmaǵan bóligin taýyp, aıǵaq retinde saraptamaǵa joldady. Saraptama qorytyndysyna jáne týystarynyń kıim-keshegin anyqtaýyna sáıkes, jedel ýákilder máıittiń habar-osharsyz joǵalǵan Maqtaaral aýdanynyń turǵynyna tıesili degen qorytyndyǵa keldi. Qylmystyq is QR QK-niń 99- baby « « Kisi óltirý « bolyp qaıta saralandy.
Maqtaaral APB-da aýyr qylmysty ashý maqsatynda polıtsııanyń neǵurlym tájirıbeli qyzmetkerlerinen turatyn jedel-tergeý toby quryldy. Jedel-izdestirý is-sharalary barysynda polıtsııa qyzmetkerleri kisi ólimine qatysty kúdiktilerdi anyqtady. Olar buryn tólem termınaldarynan birneshe urlyq jasaǵany úshin ustalǵan eki jergilikti turǵyn bolyp shyqty. Jastar bul áreketin tolyq moıyndady.
Tergeý kezinde kúdiktilerdiń paıdakúnemdik maqsatta aýyr qylmys jasaǵany belgili boldy . Olar jas áıelge shabýyl jasap, tunshyqtyryp, sodan keıin oǵan pyshaq jaraqatyn salǵan. Sodan soń kúdiktiler 300 myń teńgeni jymqyryp, qylmys ornynan qashyp ketken. Olar urlanǵan aqshanyń bir bóligin óz qajettilikterine jumsap úlgergen.
Qazirgi ýaqytta atalǵan jaıt boıynsha QR QK-niń 99-baby 2-bóligi «Adam óltirý» boıynsha sotqa deıingi tergeý júrgizilýde. Zattaı dáleldemeler retindejábirlenýshiniń zattary, urlanǵan múliktiń bir bóligi jáne kúdiktilerdiń avtokóligi alyndy. Sot sheshimimen kúdiktiler eki aı merzimge qamaldy.
Saraptama taǵaıyndaldy. Polıtsııa qyzmetkerleri qylmystyń barlyq mán-jaıyn anyqtap jatyr.
