Іz-túzsiz ketken astana turǵyny 4 kúnnen keıin Aqmola oblysynan tabyldy
EREIMENTAÝ. QazAqparat – Іz-túzsiz ketken Nur-Sultan turǵyny Aqmola oblysynyń Ereımentaý aýdanynan tabyldy, dep habarlaıdy QazAqparat.
Aımaqtyq polıtsııa departamentiniń baspasóz qyzmeti málim etkendeı, 14 shilde kúni Ereımentaý aýdandyq polıtsııa bólimine jergilikti turǵyn, 37 jastaǵy áıel habarlasqan.
Onyń aıtýynsha, Nur-Sultanda turatyn týǵan aǵasy 11 shildede úıinen shyǵyp ketip, úsh kúnnen beri qaıta oralmaǵan.
«Aryzdanǵan áıeldiń aıtýynsha, sol kúni aǵasy qaryndasynyń úıine qonaqqa kelgen. Sosyn «Úsh batyr bulaǵyna baram» dep úıden shyǵyp ketken. Ol bastaý Ereımentaý qalasynyń mańynda ornalasqan. Ol ózimen birge shatyr men azyq-túlik salyp alǵan. Polıtsııa qyzmetkerleri tez arada izdeý jumysyna kiristi» dep málim etti polıtsııa.
Joǵalǵan adamdy izdeýge volonterler men jergilikti turǵyndar da atsalysty.
Bir kýáger atalmysh erkekti qaladan 15 shaqyrym jerdegi bulaq basyna kólikpen jetkizip tastaǵanyn aıtty. Alaıda polıtseıler ol jerge barǵanda bulaq mańynda eshkim joq edi.
Vedomstvonyń málimetinshe, izdeý sharalarynyń nátıjesinde 15 shilde kúni er adam aýdan ortalyǵynan 25 shaqyrym qashyqtyqtaǵy Jylandy kóliniń jaǵasynan tabylǵan.
Tártip saqshylary joǵalǵan adamdy aman-esen úıine jetkizip tastady.
