Іz-túzsiz ketken aqtóbelik bir aıdan keıin tabyldy
AQTÓBE. QazAqparat - Aqtóbe qalasynyń turǵyny Batyrhan Ǵalıaqbarov úıinen shyǵyp ketip, 1 aıǵa jýyq ýaqyt habarsyz ketken. Polıtsııa 24 jastaǵy jigitti Hromtaý aýdanynan tapty, dep habarlaıdy QazAqparat tilshisi.
Otan aldyndaǵy boryshyn ótep, úıine oralǵan Batyrhan Ǵalıaqbarov 16 qyrkúıek kúni úıinen shyǵyp ketip, qaıta oralmaǵan. Uıaly telefony men kerek-jaraǵyn túgel tastap ketken. Arada 3 kún ótken soń týǵan-týystary polıtsııaǵa aryz jazyp, izdeý jarııalandy. Buǵan deıin habarlaǵanymyzdaı, Batyrhan Ǵalıaqbarov áskerı boryshyn ótep júrgen kezde basynan jaraqat alǵan .
«Joǵalǵan jigit Hromtaý aýdanynan tabyldy. Polıtsııa qyzmetkerleri jigitti ata-anasyna tapsyrdy»,- dep habarlady Aqtóbe oblystyq ІІD baspasóz qyzmeti. Belgili bolǵany, jas jigit aýdanǵa jumys isteýge ketken. Polıtsııa qyzmetkerleri ony jumysta júrgen jerinen taýyp aldy.
