IYU elderinde biryńǵaı halal standarty engiziledi

ASTANA. 13 jeltoqsan. QazAqparat - Birikken arab ámirlikteriniń (BAÁ) standarttaý jáne metrologııa jónindegi vedomstvosy halal azyq-túlik pen kosmetıka ónimderin biryńǵaı standarttaý jumysyn qolǵa aldy. Aldaǵy eki jylda bul jańa standarttardy 57 musylman elinde paıdalanatyn bolady, dep habarlaıdy muslim.kz saıty muslimeco.ru saıtyna silteme jasap.

Vedomstvonyń bas dırektory Muhammmed Saleh Badrıdiń (Mohammad Saleh Badri) aıtýynsha, Islam yntymaqtastyq uıymy (IYU) bul halal standarttaryn bekitkennen keıin standart musylman emes elderge eksporttalatyn azyq-túlik ónimderine qoldanylady.

Sonymen qatar, ol jańa standarttyń arqasynda halal sertıfıkatqa ketken ýaqyt pen materıaldyq shyǵyn 30-50 paıyzǵa qysqaratynyn aıtty.

Jańa biryńǵaı standartty buzǵan jaǵdaıda halal sertıfıkat keri qaıtarylady.

Jýyrda ǵana BAÁ-niń halal azyq-túlik pen kosmetıka ónimderin standarttaý jónindegi tehnıkalyq komıtettiń tóraǵalyǵyna taǵaıyndalǵanyn esterińizge sala ketkimiz keledi.