IYU dıplomattardy QazUÝ-da jınaıdy
ASTANA. QazAqparat -2018 jyldyń 12-14 qarashasynda ál-Farabı atyndaǵy QazUÝ-da «Transulttyq qaýip-qaterler, terrorızm jáne qaýipsizdik máseleleri» taqyrybyna arnalǵan Islam Yntymaqtastyǵy Uıymyna (IYU) múshe memleketter dıplomattarynyń baǵdarlyq baǵdarlamasy ótedi, dep habarlaıdy QazAqparat.
Sharany uıymdastyrýshylar: IYU Bas hatshylyǵy, QR Syrtqy ister mınıstrligi jáne ál-Farabı atyndaǵy Qazaq ulttyq ýnıversıteti. Atalǵan sharaǵa IYU-ǵa múshe memleketterdiń dıplomattary, Qazaqstandaǵy shet eldik dıplomatııalyq korpýstardyń ókilderi jáne belgili ǵalymdar men sarapshylar qatysady. Shara terrorızmge qarsy is-qımyldyń ózekti máselelerin talqylaý men qoǵamdy radıkalızatsııalaý, birlesken strategııalar jáne sharalardy ázirleý, qaýipsizdikti qamtamasyz etýmen qatar adam quqyqtaryn jáne zańnyń ústemdigin qamtamasyz etý salalary boıynsha ozyq tájirıbemen almasý jónindegi dıalog alańyna aınalady. Kezdesýge qatysýshylar IYU-nyń terrorızmmen kúrestegi ustanǵan saıasaty men róli, osy baǵyttaǵy jańa úrdisteri men baǵdarlamalary jaıly tolyqtaı tanysa alady.
Ál-Farabı atyndaǵy QazUÝ BUU «Akademııalyq yqpal» baǵdarlamasynyń ǵalamdyq habyn basqara otyryp, turaqty damý maqsattaryn júzege asyrýǵa belsendi qatysady, olardyń biri terrorızmge qarsy kúres. Ýnıversıtet jahandyq álemdegi qaýipsizdikti qamtamasyz etýge jáne adamzattyń ornyqty damýyna baǵyttalǵan halyqaralyq uıymdardyń bastamalaryna jáne baǵdarlamalaryna basa nazar aýdarady.
