Iyǵy shyǵyp ketse de, jeńiske jetken qazaq balýany: Maǵan bárinen namys qymbat boldy
ASTANA. QazAqparat - Kesheli beri qazaq kúresinen Azııa chempıonatynda ıyǵy shyǵyp ketse de, tájik balýanyn alyp urǵan qazaq jigiti jaıly vıdeo áleýmettik jelide qyzý talqylanyp jatyr. Erligimen, órligimen jalpaq jurtty tamsandyrǵan ol balýan kim boldy eken? QazAqparat tilshisi osy suraqqa jaýap izdegen edi.
Qazaq kúresinen 26 tamyzda ótken tuńǵysh Azııa chempıonaty ulttyq sportymyzdyń shetelge tanyla túsýine taǵy bir esikti ashqany anyq. Birinshilikke óz salmaǵynda (66 kelide) chempıon atanbasa da, jartylaı fınalda jankeshtilik tanytqan atyraýlyq jas balýan Nurbolat Іzimǵalıevtiń batyrlyǵy jalpaq jurtty jalt qaratty. 22 jastaǵy balýannyń bapkeri Aıbek Serǵazıevtiń aıtýynsha, jaraqatynyń keselinen Nurbolat Azııa chempıonatynda jarys jolynan shyǵyp qala jazdaǵan.
«Nurbolattyń ıyǵy bir jyl buryn shyǵyp ketip, Astana qalasynda operatsııa jasatqan. Osydan keıin ol alty aı ýaqyt demalyp, jattyǵýdy qaıta bastaǵan bolatyn. Qazaq kúresinen ótken Azııa chempıonatynda Nurbolattyń ıyǵy bir-aq shyǵyp ketip, salynbaı qoıdy. Tóreshiler úsh mınýt ýaqyt bergennen keıin balýanymyzdyń jarys jolynan shyǵyp qalý qaýpi de týdy. Medıtsınalyq kómek kórsetip, 2 mınýt 33 sekýnd ótkende, ıaǵnı bar-joǵy 27 sekýnd qalǵan kezde tórt dáriger men bir jattyqtyrýshy Nurbolattyń ıyǵyn salyp, baýyrymyz boz kilemge qaıta kóterildi», - deıdi bapkeri.
Aıbek Serǵazıevtiń aıtýynsha, Nurbolattyń jaraqaty alǵashynda et qyzýymen asa bilinbegenimen, keıin ıyǵy isip ketken eken.
«Nurbolat ıyǵy isip, qoltyǵy ashylmaı, qolyn joǵary kótere almaıtyn jaǵdaıda aqtyq saıysqa shyqty. Bylaısha aıtqanda, bir qoly jaramsyz bolyp qaldy. Biraq, báribir «osyǵan deıin keldim, endi keri sheginbeımin» dep, boz kilemge qaıta shyqty. Fınalda balýanymyzdy týrnırdiń eń myqty balýandarynyń biri - mońǵol balýany Bashýý Iondonperenleı kútip turǵan edi. Qansha qıyn bolǵanymen, Nurbolat mońǵol balýanyn eki-úsh ret sastyrdy», - deıdi bapker.
Nurbolat bala kezinen qazaq kúresimen aınalysady. Atyraý oblysy Qyzylqoǵa aýdany Mııaly aýylynda týǵan. Halel Dosmuhamedov atyndaǵy Atyraý memlekettik ýnıversıtetiniń «dene shynyqtyrý» mamandyǵy boıynsha túlegi. Qazaq kúresinen óz salmaǵynda Qazaqstannyń chempıony. Bapkeri ekeýi bir aýyldan bolǵannan keıin Aıbek Nurbolatty bala kezden jattyqtyryp júr.
Jigerliligimen áleýmettik jelide tanymaldylyqqa ıe bola bastaǵan Nurbolat Іzimǵalıevtiń ózi «boz kilemge meni qaıta alyp shyqqan - halyqtyń qoldaýy» deıdi.
«Ol jerde artqa sheginetin jol bolǵan joq. Halyq aıqaı-shýmen qoldap turǵannan keıin burynnan estip júrgen, alaıda tereńirek oıymdy júgirtpegen «namysty qoldan bermeý» degen sózdiń mánisin uqqandaı boldym. Maǵan sol sátte shyǵyp ketken ıyǵym emes, namys qymbat boldy», - deıdi balýannyń ózi.
Jigerli jigitten «kúrdeli jaraqatpen fınaldan jasqanǵan joqsyz ba?» dep suradyq. Olaı suraýymyzdyń sebebi - jaraqaty asqynyp ketken jaǵdaıda Nurbolattyń densaýlyǵyna zor qaýip tóner edi.
«Fınalǵa deıin kelip turyp, ary qaraı kúrespeı ketsem - keıin ókinetinimdi jaqsy bildim. Aıaqty orap alyp, artqa laqtyrý ádisi - eń jaqsy meńgergen amalym. Alaıda mońǵol balýanyna kelgende qolym kótertpeı, bul ádisti aıaǵyna deıin jetkize almadym», - deıdi Nurbolat.
Áleýmettik jelide jartylaı fınaldyń vıdeosy tarap, tanymal bolyp ketetinin Nurbolattyń ózi kútpepti. Fınalda tek qarsylasty qalaı utý kerektigin oılaǵan. Bastysy - «balýandyq mindetimdi atqarý» edi deıdi jas jigit.
