IX qysqy Azııa oıyndaryna qansha sportshy qatysatyny belgili boldy

ASTANA. KAZINFORM – Qytaıdyń Harbın qalasynda ótetin IX qysqy Azııa oıyndaryna qansha sportshy qatysatyny belgili boldy.

Qysqy Azııa oıyndaryn uıymdastyrý komıteti bas hatshysynyń orynbasary, atqarýshy komıtet dırektorynyń orynbasary jáne Harbın qalalyq halyq úkimeti ákiminiń orynbasary Chjan Haıhýanyń aıtýynsha, dúbirli doda tarıhta eń kóp el qatysqan qysqy Azıadanyń biri bolmaq. Oǵan Azııanyń 34 elinen/aımaqtarynan barlyǵy 1275 sportshy qatysady, olardyń arasynda 755 er sportshy jáne 520 áıel sportshy bar.

Sondaı-aq, muz sportyna 847 sportshy (513 er, 334 áıel) jáne qardaǵy sport túrine 428 sportshy (erler 242 adam, 186 áıel) qatysady.

Onyń aıtýynsha, alǵashqy jarystar 3 aqpanda bastalyp, 8 aqpan kúni alǵashqy altyn medal ıegeri anyqtalady.

Eske salsaq, IX qysqy Azııa oıyndary 2025 jyldyń 7-14 aqpany aralyǵynda Qytaı Halyq Respýblıkasy Heılýntszıan provıntsııasynyń Harbın qalasynda ótedi. Sportshylar 11 sport túri boıynsha 64 medal jıyntyǵyn sarapqa salady.

QR Týrızm jáne sport mınıstrliginiń habarlaýynsha, Qazaqstannan 139 sportshy el namysyn qorǵaıdy. 

Osyǵan deıin qysqy Azııa oıyndary bıletteri resmı satylymǵa shyqqanyn jáne alaý estafetasy bastalǵanyn jazǵan edik.