Ivanovoda Naýryzdy toılaýǵa arnalǵan saltanatty shara ótti (FOTO)
MÁSKEÝ-IVANOVO. QazAqparat - Ivanovoda Naýryzdy toılaýǵa arnalǵan saltanatty shara ótti. Ivanovo jáne Ivanov oblysynyń etnomádenı birlestik ókilderi, oblystyq jáne qalalyq ákimshiliktiń depýtattary, sonymen qatar qala turǵyndary men qonaqtary shara qonaqtary boldy.
Shara qonaqtary Ivanovo etnomádenı birlestikterdiń talantty ókilderiniń ónerine tánti bolyp, ulttyq taǵamnan dám tatty.
Ivanovtyq ulttar úıiniń dırektory Nıkolaı Karıkanyń aıtýynsha,
Ivanov oblysynda shamamen 50 ulttyń ókilderi bar jáne 31 ulttyq qoǵamdyq uıym jumys isteıdi.
N.Karıka qala jáne Ivanov oblysynyń mádenı jáne áleýmettik-ekonomıkalyq salasyndaǵy qazaq dıasporasynyń belsendi rólin atap ótti.
«Qazaq dıasporasy belsendiligimen erekshelenedi. Ol Ivanovoda Naýryz merekesin uıymdastyrý bastamasyn kótergenderdiń biri»- dedi N.Karıka.
Sondaı-aq ol bizdiń elimizdegi ultaralyq jáne konfessııaaralyq kelisimdi aıta kele, onyń ózgelerge úlgi bola alatynyn atap ótti.
Ivanov oblysyndaǵy qazaq dıasporasynyń atynan quttyqtaǵan «Eýrazııalyq dıalog» qorynyń basshysy Aıjan Túzelbekova 25 naýryzda Ivanovoda saýda úıi ashylatynyn jáne onda qazaqstandyq ónimdi satyp alýǵa bolatynyn aıtty. Ol saýda úıiniń Naýryzdy toılaý kezinde ashylýy Qazaqstan men Reseı halqy arasyndaǵy mádenı jáne áleýmettik-ekonomıkalyq baılanysynyń dáleli ekenin atap ótti.
Qazaq dıasporasy men «Eýrazııalyq dıalog» qorynyń shaqyrýymen QR OQO-dan delegatsııa keldi. Olardyń ishinde belgili ánshi, QR Mádenıet qaıratkeri Merýert Túsipbaeva bar.
