Ivan Ýrgant qazaqstandyq ushqyshtar jaıynda qaljyńdady
ASTANA. QazAqparat - Reseılik telejúrgizýshi Ivan Ýrgant «Vechernıı Ýrgant» baǵdarlamasy barysynda Aqtóbede jolǵa qonǵan qazaqstandyq áskerı ushqyshtar jaıynda qaljyńdady, dep habarlaıdy QazAqparat.
Tanymal telebaǵdarlamanyń jazbasy Youtube vıdeohostınginde jarııalanyp otyr.
«Biz bul oqıǵany qalaı túsindirsek eken dep jatqanda, Qazaqstan Qorǵanys mınıstrliginiń baspasóz qyzmeti bizdiń aldymyzdy orap ketti. Qorǵanys mınıstrligi bylaı dep jazypty: Mı-8 tikushaǵy jergilikti turǵyndardy baqylaý ádisimen vızýaldy baǵdarlaýdy qalyptastyrý máselesin pysyqtaı otyryp, áskerı oqý-jattyǵý tapsyrmasyn oryndady. Ekıpaj avtokólik jolyna qonyp, jaqyn jerde ornalasqan eldi mekenderdi naqtylady, qaıta ushyp, oqý-jattyǵý tapsyrmasyn aıaqtady», - dedi atalmysh rolıkke baǵasyn bergen Ivan Ýrgant.
Osy kezde zalda otyrǵan kórermender dý kúldi.
«Bul tanymal qazaqstandyq áskerı saýalnama ádisi», - dep qosty shoýmen.
Ivan Ýrgant Qazaqstan áskerıleri álemge jergilikti jerde navıgatsııalyq baǵdarlaýda jańa noý-haý kórsetti dep sanaıdy.
«Qarýly qaqtyǵys bolyp jatqanda, bir erkek tikushaqtan atyp shyǵyp, «Jigitter, stop! Saýalnama ádisi: Bizdiń shtab qaıda? Anda ma? Rahmet!», dep ary qaraı ushyp ketedi», - dep qaljyńdady Ýrgant.
Buǵan deıin habarlanǵandaı , Shymkent-Samara tas jolynyń boıynda boran kezinde adasyp ketken tikushaq qonyp, olar júrgizýshilerden baǵyt suraǵan. Áleýmettik jelide jarııalanǵan rolıkte tikushaq elimizdiń qorǵanys salasyna tıisili ekendigi aıtylǵan bolatyn.
«QR QK Áskerı-áýe kúshteriniń Mı-8MT tikushaǵy jergilikti turǵyndardy baqylaý ádisimen vızýaldy baǵdarlaýdy qalyptastyrý máselesin pysyqtaı otyryp, áskerı oqý-jattyǵý tapsyrmasyn oryndady. Ekıpaj avtokólik jolyna qonyp, jaqyn jerde ornalasqan eldi mekenderdi naqtylady, qaıta ushyp, oqý-jattyǵý tapsyrmasyn aıaqtady», dep málim etti QR Qorǵanys mınıstrligi.
Qazirgi ýaqytta tikushaq áýeaılaq bazasynda tur.
«Armııa avıatsııasyndaǵy ushý quramynyń jaýyngerlik daıarlyq josparyna sáıkes túrli navıgatsııalar tásilderin pysyqtaý baǵyty jáne ushý daıarlyǵynyń kýrsyna sáıkes jerlerdi (ushýlardy), onyń ishinde aýa-raıynyń buzylýy kezinde baǵdarlaýdy júrgizý boıynsha ushýdy oryndaıdy», - delingen túsiniktemede.
