Ivan Saýer: Kontrafaktilik ónimder bárine kedergi keltirip otyr
ASTANA. QazAqparat - «Rodına AF» JShS-niń bas dırektory Ivan Saýer sút jáne aýyl sharýashylyǵy ónimderiniń kontrafaktilik jaǵdaılarymen kúresý baǵytynda óz oıymen bólisti, dep habarlaıdy «QazAqparat» HAA tilshisi.
«Kontrafakti búgin bárine de kedergi keltirip otyr. Eń aldymen, óndiristik ónim halyqtyń qajettiligin qanaǵattandyrý úshin óndiriledi. Al kontrafakt barda halyqtyń qajettiligin qalaı qanaǵattandyrýǵa bolady? Bul sózsiz ádiletti báseke emes, aldaý. Tipti keıde kontrafaktilik ónimder dúkenderde tabıǵı ónimderden qymbat turady», - dedi Ivan Saýer «Rodına AF» JShS-da tilshilerge bergen suhbatynda.
Ol sonymen birge kontrafaktilik ónimdermen kúresý joldary týraly óz oıymen bólisti.
«Alys nemese jaqyn shetel bolsyn, biz olardyń naryǵyna shyqqymyz kelse, olardyń talaptarynyń tizimin qarap otyryp, syrtqy naryqqa shyǵýǵa betiń qaıtyp qalady. Al olar bizge qalaısha jep-jeńil kirip jatyr? Men tehnıkalyq reglamentterdi retteýdi, protsesterdi basqarýdy Aýyl sharýashylyǵy mınıstrligine berý kerek dep esepteımin. Solaısha, biz júrgizilgen saraptamanyń sapasyn qamtamasyz etip, kontrafaktiniń bizdiń naryqqa enýine jol bermes edik», - deıdi Saýer.
Agrofırma basshysynyń sózine sensek, keıbir ónimderdiń enip ketýi jaǵynan shekten shyqqan jaǵdaılar tirkelip jatady.
«Máselen, Reseıdegi óndirýshiler bizdiń naryqta istep jatqan isin óz elinde jasaı da almaıdy. Eger sút qaıta qalpyna keltirilgen ónim bolsa, olar mindetti túrde qaptamada ony jazýy kerek. Al qaptamany oqysań - ol sút jańa ǵana saýylyp ákelingendeı kórinedi. Bul bylaısha aıtqanda, burmalaý», - deıdi Ivan Saýer.
