Ivan Romazan memorıaly: «Barys» alǵashqy jeńisine jetti

ASTANA. KAZINFORM - Elordalyq «Barys» búgin shaıbaly hokkeıden maýsym aldyndaǵy dástúrli Ivan Romazan memorıalyna ekinshi oıynyn Reseıdiń «Salavat ıÝlaev» (Ýfa) komandasyna qarsy ótkizdi.

Kezdesý barysynda elordalyq klýb sapynda jańadan qosylǵan hokkeıshiler shyqty. Olardyń qatarynda AQSh-tan kelgen Maıkl Vekkone bar. Tájirıbeli oıynshy óziniń alǵashqy kezdesýinde mergendik tanytyp úlgerdi. Ol oıynnyń 11-mınýtynda kózdegen nysanadan múlt ketken joq.

Oǵan deıin reseılik klýbtan Prohor Korbıt 10-mınýtta esep ashqan edi.

Al «Barys» sapynan Álıhan Ásetov 21, 31-mınýtta basymdyqty arttyrsa, odan keıin reseılik komandadan Danıl Alıahın 34, Aleksander Hmelevskı 50-mınýtta tarazy basyn teńestirdi.

Oıyn 3:3 esebimen teń aıaqtalyp, overtaımda elordalyq klýbtan Dinmuhamed Qaıyrjan jeńis shaıbasyn soǵyp ketti.

Osylaısha «Barys» qarsylasynan 4:3 esebimen qapy qaldyryp, alǵashqy jeńisine qol jetkizdi. 
Qazirge deıin astanalyq komanda atalǵan týrnırde Reseıdiń «Magnıtka» komandasyna 1:2 esebimen jol berdi.

Elordalyq hokkeıshiler úshinshi oıynda 29 tamyzda 19:00–de «Metallýrg» (Magnıtogorsk) komandasymen sheberlik baıqasady.

Qazaqstandyq klýb jańa maýsymda alǵashqy úsh oıynda elordada ótkizedi. Aldymen 7 qyrkúıekte Reseıdiń «Traktor» (Chelıabınsk) komandasymen kezdesse, odan keıin 9 qyrkúıekte «Amýr» (Habarovsk), 13 qyrkúıekte Belarýstiń «Dınamo» (Mınsk) klýbtarymen sheberlik baıqasady.