Ivan Dychkonyń qarsylasy ózinen 30 kg aýyr bolyp shyqty
Qazaqstan kásipqoı boks federatsııasynyń VKontakte paraqshasynda habarlanǵandaı, búgin Ivan Dychko Gollıvýdtaǵy (AQSh, Florıda shtaty) Seminole Hard Rock Hotel and Casino kesheninde aıqas ótkizedi. Aıqas aldynda ol salmaq ólsheý rásiminen ótken.
«Dychkonyń salmaǵy - 108,4 keli. Al onyń qarsylasy Reı Ostınniń salmaǵy - 137,4 keli ekeni belgili boldy. Osylaısha, amerıkalyq óziniń qazaqstandyq qarsylasy Dychkodan 29 keli aýyr bolyp shyqty. Aıqas asa aýyr salmaq dárejesinde ótedi», - delingen habarlamada.
Ivan Dychkonyń 48 jastaǵy amerıkalyq boksshymen jekpe-jekke shyǵatyny buǵan deıin habarlanǵan bolatyn. Atalmysh keshtiń «jeńilmegender keshi» dep atalýy tegin emes. Sebebi, ol kúni Seminole Hard Rock Hotel and Casino kesheninde jeńilip kórmegen 7 boksshy sharshy alańǵa shyǵady.
Óziniń sońǵy aıqasyn Ivan Dychko ótken jyldyń shilde aıynda ótkizip, amerıkalyq Morıs Harrısti alǵashqy raýndta nokaýtqa jibergen edi.
Eske sala ketsek, osydan bir apta buryn aýyr salmaqtaǵy qazaqstandyq kásipqoı boksshy Ivan Dychko (7-0, 7KO) WBA, WBO jáne IBF nusqalary boıynsha álem chempıony Entonı Djoshýany (22-0, 21KO) aıqasqa shaqyrǵan edi. Qazaqstandyq boksshy bul qadamǵa Djoshýanyń qarsylasy Djarell Mıllerdiń (23-0-1, 20KO) dopıng-testten ótpeı qalýy sebep bolǵan edi.