Ivan Dychko kelesi jekpe-jegin qashan jáne qaıda ótkizetini anyqtaldy

ASTANA. QazAqparat - Olımpıada oıyndarynyń eki dúrkin qola júldegeri Ivan Dychko (7-0, 7 KO) kásipqoı bokstaǵy kelesi jekpe-jegin 1 naýryz kúni AQSh-ta ótkizedi, dep habarlaıdy QazAqparat Sports.kz-ke silteme jasap.

Málim bolǵandaı, jekpe-jek Florıda shtatynyń Hollıvýd qalasyndaǵy Seminole Hard Rock Hotel and Casino kesheninde ótedi.

«Ázirge Dychkoǵa kim qarsylas bolary belgisiz. Kreıg Lıýıs (14-3-1, 8 KO) bar, biraq onymen 10 raýnd bokstasý kerek. Al Ivan sońǵy kezde asa belsendi bolmaǵandyqtan, 6 raýndqa shaqtalǵan kezdesý ótkizgen jón. Sondyqtan opponentti áli de tańdaıtyn bolamyz. Ázirge bul toqeterlik sheshim emes, bizge osy ýaqytta kelip túsken usynystardyń biri. Ivan Lıýıspen jazda kezdesýi kerek bolǵan. Biraq arada úzilis bolǵandyqtan 6 raýndtyq jekpe-jek ótkizemiz», - deıdi boksshynyń menedjeri Zııa Álıev.