Ivan Dychko qarsylastaryn 7 ret nokaýtqa jibergen amerıkalyqpen kezdesedi
«Qazaqstan kásipqoı boksy» VKontakte paraqshasy habarlaǵandaı, aýyr salmaqtaǵy qazaqstandyq boksshy amerıkalyq Neıt Hevenmen (9-2, 7KO) qolǵap túıistiredi. Aıqas segiz raýndqa eseptelip otyr. Jekpe-jektiń 12 shildede ótetini belgili bolǵanymen, naqty qaı jerde uıymdastyrylatyny áli belgisiz.
Áý basta Dychko brazılııalyq Rafael Zýmbanomen (39-16-1, 31KO) kezdesedi dep habarlanǵan bolatyn, alaıda bul aıqas ótpeıtin boldy.
Eske sala ketsek, jeńilip kórmegen qazaqstandyq kásipqoı boksshy Ivan Dychko sońǵy aıqasynda amerıkalyq Reı Ostındi úshinshi raýndta tize búktirgen bolatyn. Aıqas úsh raýndqa ǵana sozyldy. Ózinen 20 jas úlken, salmaǵy 29 keli aýyr Reı Ostın kópke barǵan joq. Ózinen jas ári qaıratty Ivannan úshinshi raýndta tehnıkalyq nokaýt aldy.
Ivan Dychkonyń menedjeri Zııa Álıev boksshynyń bıylǵa qurǵan jospary týraly aıtyp bergen edi.
«12 shildedegi jekpe-jekten keıin Ivan tamyzda taǵy bir kezdesý ótkizedi. Biz ony qaıta babyna keltirýge áreket etip jatyrmyz. Ivan bıyldyń sońyna deıin úsh jekpe-jek ótkizetini anyq. Osy jyldy Ivan 11-0 nemese 12-0 rekordymen aıaqtaıdy dep otyrmyz. Kásipqoı boksta, ásirese Amerıkada nokaýttardyń mańyzy zor. Ol gonorarǵa da, aıqastyń qyzyq bolýyna da, televıdenıege de áser etedi. Ivan aldaǵy kezdesýleriniń barlyǵyn nokaýtpen aıaqtasa eken dep tilep otyrmyz», - deıdi Álıev.