Ivan Dychko elordadaǵy jeńisinen keıin AQSh-ta óner kórsetedi

NUR-SULTAN. QazAqparat – Sýperaýyr salmaqtaǵy qazaqstandyq boksshy Ivan Dychkonyń (11-0, 11 KO) menedjeri Zııa Alıev boksshymyzdyń 2022 jyly ótetin alǵashqy jekpe-jegi týraly aıtty, dep habarlaıdy QazAqparat Sports.kz saıtyna silteme jasap.

«Ivan Amerıkada bokstasady. Jańa jyldan keıin – qańtar aıynda aıqasqa daıyndyqqa attanady. Ol rıngke aqpan aıynda shyǵady dep josparlanýda. Onyń jekpe-jegin amerıkalyq telearna kórsetedi», - dep málim etti Z.Alıev «Sport Shredıngeraǵa».

Eske salaıyq, Ivan Dychko 18 jeltoqsan kúni elordada Táýelsizdiktiń 30 jyldyǵyna oraı ótken kásipqoı boks keshinde óner kórsetti. Ol birinshi raýndta tehnıkalyq nokaýtpen reseılik Aleksandr Ýstınovty (36-5-1, 27 KO) jeńdi.

Keshtiń basty aıqasy Danııar Eleýsinov (11-0, 6 KO) pen argentınalyq Hýan Ernan Leal (15-2, 4 KO) arasynda ótip, kezdesý qazaqstandyq boksshynyń jeńisimen aıaqtaldy. D.Eleýsinov IBO-nyń vakantty beldigin ıelendi.

Sondaı-aq kesh barysynda Erjan Zalılov Eskendir Harsanmen judyryqtasyp, Qazaqstan chempıony ataǵyna ıe boldy.

Ózge nátıjeler:

1. Ivan Dychko (Qazaqstan) Aleksandr Ýstınovty (Reseı) jeńdi.

2. Elhan Tabynbaev (Qazaqstan) Elmar Abdýllaevty (Ázerbaıjan) jeńdi.

3. Aqnıet Álimbaı (Qazaqstan) Zaınobıddın Sobırovty (Ózbekstan) jeńdi.

4. Aıdar Ámirzaqov (Qazaqstan) Dılshodbek Isroılovty (Ózbekstan) jeńdi.

5. Asqat Jantursynov (Qazaqstan) Sýrat Garaevtan (Ázerbaıjan) jeńilip qaldy.

6. Saparbaı Aıdarov (Qazaqstan) Andreı Shemetovty (Ýkraına) jeńdi.

7. Aıdar Sháribaev (Qazaqstan) Shohrýh Abdıevti (Reseı) jeńdi.

8. Dáýlet Dáýkenov (Qazaqstan) Eldorbek Saıdovty (Ózbekstan) jeńdi.

9. Angelına Lýkas (Qazaqstan) Svetlana Vasılevskaıany (Ýkraına) jeńdi.

10. Dáýren Eleýsinov (Qazaqstan) Alı Mammadovty (Ázerbaıjan) jeńdi.

11. Janqosh Turarov (Qazaqstan) Abdýmonem Saıdty (Mysyr) jeńdi.

Boks keshi «Habar» telearnasynyń tikeleı efırinen kórsetildi.