Ivan Dychko AQSh-tyń tájirıbeli boksshysymen jekpe-jek ótkizedi

NUR-SULTAN. QazAqparat – Sýperaýyr salmaqtaǵy qazaqstandyq boksshy Ivan Dychkonyń (11-0, 11KO) aldaǵy jekpe-jegindegi qarsylasy belgili boldy, dep habarlaıdy QazAqparat.

VKontakte áleýmettik jelisindegi «Qazaqstannyń kásipqoı boksy» paraqshasynda málim etilgendeı, I.Dychkonyń aıqasy 16 sáýir kúni Amerıkanyń Merfrısboro (Tennessı shtaty) qalasynda ótedi. Opponenti – jergilikti sportshy Denıel Martts (20-10-1, 17KO). Kezdesý 10 raýndqa eseptelgen.

Ivan munyń aldyndaǵy jekpe-jegin byltyrǵy 18 jeltoqsanda Nur-Sultan qalasynda ótkizdi. Ol birinshi raýndta tehnıkalyq nokaýtpen reseılik boks ardageri Aleksandr Ýstınovti (36-6-1, 27KO) jeńdi.

Qazirgi ýaqytta Dychko Florıda shtatynda daıyndyq ótkizýde.