IV jasóspirimder Olımpıadasynyń jeńimpazdary men júldegerlerine Prezıdenttiń alǵys haty tabystaldy
ASTANA. KAZINFORM — Qazaqstan Premer-Mınıstri Oljas Bektenov 19 qańtar men 1 aqpan aralyǵynda Kanvondoda (Koreıa Respýblıkasy) ótken IV qysqy jasóspirimder Olımpıadasynyń jeńimpazdary men júldegerlerine Memleket basshysynyń atynan alǵys hattar tabys etti, dep habarlady Úkimettiń baspasóz qyzmeti.
Úkimet basshysy QR Prezıdenti Qasym-Jomart Toqaevtyń alǵys hatyn oqyp berip, sportshylardy qol jetkizgen nátıjelerimen quttyqtady. Premer-Mınıstr bul Qazaqstannyń jastar arasyndaǵy qysqy Olımpıada oıyndary tarıhyndaǵy alǵashqy altyny ekenin atap ótti. Jalpy medal sany boıynsha Qazaqstan álemniń 78 eli arasynda 20-shy oryndy ıelendi.
«Sport – eldiń mártebesin bıiktetip, memlekettiń qýaty men ósip kele jatqan áleýetine degen adamdardyń senimin nyǵaıta túsetin mańyzdy faktor. Qazaqstandyqtar Sizderdiń jeńisterińizdi maqtan tutady. Ózderińiz sııaqty erik-jigeri myqty jas sportshylardyń elimizdiń bolashaǵy ekenine kámil senemin. Jeńis jolynda qoldaý kórsetken tálimgerler men jattyqtyrýshylar erekshe alǵysqa laıyq. Búgingi baǵyndyrǵan bıik belester aldaǵy olımpıadalardaǵy jetistikterdiń bastaýy deýge bolady», - dedi Oljas Bektenov.
Shańǵymen tuǵyrdan sekirý boıynsha IV qysqy jasóspirimder Olımpıadasynyń jeńimpazy Ilıa Mızernyh pen onyń jattyqtyrýshysy Qaırat Bıekenovke alǵys hattar tabys etildi.
Sonymen qatar shaıbaly hokkeı boıynsha qola júlde oljalaǵan Arsenıı Kýchkovskıı, Nıkıta Kýlakov, Temirlan Aıboluly, Matveı Reshetko, Rasýl Tursynov, Jahanger Tileýhan, Taır Bıgarınov, Egor Kravchenko, Roman Mıchýrov, Ádilhan Sattar, Ánýar Ahmetjanov jáne komandany jattyqtyrýshy Ramazan Qaıdarovtyń da eńbekteri atalyp ótildi.
Oıyndar jeńimpazy Ilıa Mızernyh barlyq sportshynyń atynan alǵys bildirip, daıyndyq kezinde quramanyń jattyqtyrýshylar qoıǵan mindetterdi barlyq kúsh-jigerin salyp oryndaǵanyn aıtty.
«Altyn medal – meniń ǵana jeńisim emes, bul búkil komanda men jattyqtyrýshylar quramynyń jumysynyń nátıjesi. Elimizdiń Prezıdenti Qasym-Jomart Kemeluly Toqaevtyń quttyqtaýyn estip, tóbem kókke jetkendeı boldy. Ol maǵan jáne basqa qazaqstandyq sportshylarǵa da jańa jeńister tiledi. Bul bizdi odan ári shabyttandyra túsedi. Shalǵaıda júrsek te, biz úlken qoldaýdy sezindik, bul – bizdiń ortaq jeńisimiz! Alǵa, Qazaqstan!», - dedi ol.
