IV Almaty marafony bastaldy
ALMATY. QazAqparat- Búgin Almaty qalasynda tańǵy saǵat 8:15-te IV Almaty marafony bastaldy. Oǵan 15 000 jýyq adam qatysýda. Olardyń arasynda qarapaıym qala turǵyndary, belgili sportshylar men kásipkerler, joǵary oqý oryndarynyń, Almaty ákimdiginiń ókilderi jáne basqa kóptegen mekemelerdiń qyzmetkerleri qatysýda.
Marafon bastalar aldynda qatysýshylardyń aldynda qysqasha sóz sóılegen Almaty qalasynyń ákimi Ahmetjan Esimov búgingi kúnniń erekshe kún ekendigin, óıtkeni jarystyń kezekten tys Prezıdent saılaýymen qatar ótip jatqandyǵyn aıtyp, jarystan soń qatysýshylardy saılaýshylar retinde belsendilik tanytyp, saılaýǵa qatysýǵa shaqyrdy jáne búgingi jarysta olarǵa sáttilik tiledi.
Esterińizge sala keteıik, Marafon 2012 jyldyń 27 mamyrynan bastap, qoǵamdyq marafondar ótkizip turatyn iri álemdik astanalardyń qataryna endi. Alǵashqy qaıyrymdylyq marafonyna 2500 adam qatysty. Bir jyldan keıin 2013 jyly 28 sáýirde jarys sóresine 6000 jelaıaq shyqqan edi. Endi mine, 15 myńdaı adam qatysýda. Naqty sany keıinirek belgili bolady. Óıtkeni búgingi jarysta nómirsiz júgirip jatqandar da bar.
Júgirister 3 shaqyrym, 10 shaqyrym, 21 shaqyrym, estafetalyq «ekıden» jáne 42 shaqyrym 195 metrlik qashyqtyqta bolyp jatyr.
Marafonnyń basty demeýshi seriktesteri : Shell Lubricants kompanııasy, Astana Group kompanııalar toby, «Qazaqstan halyq banki», MEGA saýda oıyn-saýyq ortalyǵy, Adidas kompanııasy jáne taǵy basqalar.
QR Tuńǵysh Prezıdenti saıabaǵynan bastaý alǵan marafon Ortalyq stadıonda aıaqtalady.
Jarys aıaqtalǵan soń jeńimpazdarǵa maqtaý qaǵazdary, medaldar jáne baǵaly syılyqtar tabys etiledi.
