Ittiń ıesin jazalaýdy suraımyn – qaza bolǵan oqýshynyń ájesi
AQTÓBE. QazAqparat – Aqtóbede 12 jastaǵy oqýshynyń óliminen soń qozǵalǵan qylmystyq is júrgizilip jatyr. Marqum Madııar Shákirattyń ájesi ıt ıesin jazalaýdy suraıdy, dep habarlaıdy QazAqparat tilshisi.
Aqtóbe qalasy Eset batyr turǵyn úı alabynda qaıǵyly oqıǵa boldy. Polıtsııa 12 jastaǵy Madııar Shákirattyń kóp qan ketip, dene jaraqatynan qaza bolǵanyn rastady .
«Allanyń salǵan isine ár pende kónedi. Kónbeske amal joq. Biraq nemeremniń zábir kórip, qınalyp, eshkimnen kómek kórmeı, eki kózi jáýdirep, qıyndyqpen ómirden ozǵanyna ishim qan jylap tur. Adamnyń jany qadirsiz bolǵany ma? Ittiń jany qymbat bolyp ketti me? It atýǵa bolmaıda degen ne sóz! Ittiń ıesin taýyp, shara qoldanýdy suraımyn. Ózegimdi órteıdi, ókinish. Balany qurylys kompanııasynyń kúzetshisi taýyp alyp, polıtsııaǵa habar bergen. Anasy máıithanaǵa bardy. Saý jeri qalmaǵan», - dedi marqum oqýshynyń ájesi Naǵıma Valıeva.
Aıtyp óteıik, ýchaskelik polıtsııa qyzmetkerleri ıt-mysyq atýǵa qarsy jańa zań shyqpas buryn 900-den astam aıyppul salǵan. Onyń 600-den astam aıyppuly ıttiń ıesine jazyldy. Ózgesi jaıylyp, jolǵa shyǵyp ketken mal ıesine tıesili.
«25 mamyrdan bastap Aqtóbe qalasynyń veterınarııa stansasy turǵyndar men ýchaskelik polıtsııadan aryz qabyldap, jumys istedi. Búginge deıin 274 ıt-mysyq aýlanyp, kózi joıyldy. Bul az. Buǵan deıin ıt atý maýsymynda kúnine 100 ıt joıylsa, osydan-aq aıyrmashylyqty kórýge bolady. Veterınarlarǵa aryz túskenmen, janýar bir jerde turmaıdy. Keıde baryp, tappaı qalady. Jergilikti bıýdjetten bul jumystarǵa 42 mıllıon teńge bólindi. Ony aýlap, ustaýǵa ruqsat berse, osy qarjy qoldanylady. Zań boıynsha bul jumysty 18 shilde kúni bastaýǵa bolady», - dedi oblys ákiminiń orynbasary Jaqsyǵalı Imanqulov.
Aqtóbe óńirlik kommýnıkatsııalar qyzmetinde ótken baspasóz máslıhatynda oblys ákiminiń orynbasary óz jaýapkershiligine qatysty suraqqa da jaýap berdi.
«Jaǵdaı qıyn bolyp tur. It sany kóbeımese, azaımady. Jaýapqa kim tarqylady? Ár adam óz jumysyna jaýapty bolýy kerek. Oblys ákiminiń orynbasary retinde men de jaýaptymyn. Oblystyq veterınarııa basqarmasy, qalalyq veterınarııa stansasy, veterınar maman jaýapty. Osy jumysty atqara almadyń dese, men qyzmetimnen ketýge ázirmin», - dedi Jaqsyǵalı Imanqulov.
