Itti ózińe baǵyndyrý, aıtqanyńdy buljytpaı oryndatý ońaı emes- kınolog Shýaq Balǵabekuly
Osy oraıda ıtterdi sol jumysqa beıimdep, mańyzdy mindetti zor jaýapkershilikpen oryndaı biletin kınolog mamandar qyzmeti jaıynda ne bilemiz?
QazAqparat tilshisi Qyzylorda qalasyndaǵy ZK-169/1 mekemesiniń baqylaýshy-kınolog mamany Shýaq Balǵabekulynyń atqaratyn qyzmetin barysyn baǵamdaı otyryp, olardyń qyzmetine bir sát zer saldy.
Kóp adam kınologııa ǵylymyn, kınolog mamandyǵyn kınomen, kınomatografııamen shatastyrýy múmkin. Sebebi, ataýy uqsas, sondaı áser qaldyratyny anyq. Shyn máninde, ol buryn paıda bolǵan, bul mamandyq ıeleri ıtterdi qolǵa úıretýmen aınalysady.
Qyzylorda qalasyndaǵy ZK-169/1 mekemesiniń baqylaýshy-kınolog mamany Shýaq Balǵabekuly bul qyzmetke kelgenine 10 jylǵa jýyq ýaqyt boldy. Sodan beri kınolog bolyp jumys isteıdi. Ózi bala kúninen ıtti jaqsy kóretin, áskerde júrgende kınologııa bólimine qabyldandy. Sodan beri ıtterdi úıretip, olardy túrli jumystarǵa baýlyp keledi.
Iisshil ıtterdi qalaı úıretedi? Bul jóninde Shýaq óz oıymen bylaısha bólisti.
«Ol úshin ıtpen myqty baılanys ornatý kerek. Sol kezde ǵana ol da saǵan senetin bolady. Kez-kelgen qıyndyqta seni eshqashan tastamaıdy. Aldymen onyń minezin naqtylap, neni jaqsy kóredi, neni unatpaıdy degen saýaldarǵa jaýap tabýyń tıis. Sonyń bárin naqty bilýiń qajet. Jalpy, úıretý barysynda ıtti urýǵa bolmaıdy. Ol da kez-kelgen qıyn sátte óz ıesinen kómek kútedi. Ol sóıleı almaǵanmen, tilin túsingen adamǵa ony is-qımylmen bildiredi. Qazaq halqy ony jeti qazynanyń biri sanaıdy. Itti ózińe baǵyndyrý, aıtqanyńdy buljytpaı oryndatý ońaı emes. Olardyń minezi adam balasy sekildi holerık, sangvınık, flegmatık jáne melanholık bolyp tórtke bólinedi. Dál sol sekildi minezine qarap, qaı ıttiń qaı salada jumys isteýge beıim ekenin anyqtaýǵa bolady. Óz basym ásker qatarynda qyzmet etken jyldary olardy úıretýdiń barlyq qyr-syryn, aılasyn úırendim. Tájirıbeli mamandardan bilim aldym. Sol sebepti men úshin qazir kınologııa ómirimniń bir bólshegine aınaldy», - dedi Shýaq Baltabaıuly.
Qyzylorda oblystyq qylmystyq atqarý júıesi departamentiniń baspasóz mamany Dana Dostanovanyń aıtýynsha, departamentte kınologııa qyzmeti 2013 jyly ashylǵan. Búgingi tańda munda qyzmettik 4 belgııalyq ovcharka bar. Olar esirtki zatyn izdep, adamdy aıaq iziniń ıisimen tabady. Túzeý mekemesinen sottalǵandar qashqan jaǵdaıda nemese esirtki tasymaldansa, qyzmettik ıtter qylmystyń aldyn alýǵa atsalysady.
«Maǵan Oskar atty kyzmettik ıt bekitilgen. Ol adamdy iziniń ıisimen izdep tabady. Oskar Almaty qalasyndaǵy Kınologııa ortalyǵynda alǵashqy daıarlyqta jaqsy nátıje kórsetti. Budan bólek, Osko jáne Lıýtyı atty esirtki izdeýshi kyzmettik ıtter sol ortalyqtan 2018 jyly alǵashqy daıarlyq, byltyr qaıta daıarlyqtan ótti. Jaqsy kınolog basqa mamandyq ıeleri sekildi árdaıym izdeniste júrip, kásibıligin, sheberligin arttyrýy tıis. Sonyń bir joly - halyqaralyq ıt kórmelerine qatysý. Ol kınologtardyń kásibı deńgeıde bir-birimen tájirıbe, bilim almasýyna jol ashady. Búginde óz basym elimizdiń barlyq óńirindegi osy salada qyzmet etetin mamandarmen baılanysyp, bilmegenimdi úırenip, bilgenimdi úıretip júrmin», - dedi ol.
Kınolog bolý - ıtpen birge júrý ǵana emes, ıttiń anatomııasyn, fızıologııasyn, psıhologııasyn tereń zerdeleý, onyń aýrýlaryna em izdeý, durys tamaqtandyrý. Bul mamandyqtyń kópshilik bile bermeıtin qyr-syry kóp. Olarǵa kúnine eki ret, tańerteń jáne keshke quramy dárýmenge baı, arnaýly jem-sý beriledi. Immıtatordy paıdalana otyryp esirtki ıisin umytyp kalmas úshin kúndelikti 2 márte oqý jattyǵý júrgiziledi. Eń bastysy, mamandar úshin shydamdylyqpen maqsattylyq, tabandylyq pen baqylaǵyshtyq qasıet qajet.
Aǵa serjant Shýaq Balǵabekulynyń kúndelikti qyzmet barysynda ZK-169/5 mekemesiniń syrt aımaǵyn baqylaıdy. Sondaı sátterde mekeme aýmaǵyna tyıym salynǵan zattardy syrttan laqtyrýǵa kelgen azamattardy der kezinde anyqtap, tıisti organdarǵa tapsyrǵan.
«Qyzmettik ıttiń kómegimen jyl basynan birneshe keleńsiz jaǵdaıdyń joly kesildi. Máselen, mekemege tyıym salynǵan uıaly telefon laqtyrmaq bolǵan bir azamat ustaldy. Oǵan QR Ákimshilik quqyqbuzýshylyq týraly kodeks boıynsha eskertý jarııalandy. Al mamyr aıynda bir azamatsha jazasyn óteýshi jaqynyna esirtki ótkizbekshi boldy. Ol qyzmettik ıtterdiń kómegimen qolǵa tústi. Qazir oǵan baılanysty QR Qylmystyq kodeksiniń 297 babynyń 1 bóligimen is júrgizilýde». - dedi Shýaq Balǵabekuly.