Itterdi qolǵa úıretý 33 myń jyl buryn Shyǵys Azııanyń ońtústiginde bastalǵan
ASTANA. QazAqparat - Bizdiń ǵalamsharymyzda ıtterdiń 400-den astam tuqymy bar. Úlken aıyrmashylyqtaryna qaramastan, olardyń barlyǵy sur qasqyrdan taraǵan, dep habarlady Sınhýa.
Qytaı Ǵylym akademııasynyń (QǴA) Kýnmın zoologııalyq ınstıtýtynyń ǵylymı qyzmetkeri Van Godýnnyń aıtýynsha, adamnyń tórt aıaqty dosynyń paıda bolý tarıhyn naqtylaý úshin qytaılyq ǵalymdar toby álemniń túrli aýdandarynda mekendeıtin sur tústi qasqyrlar men túrli tuqymdaǵy ıtterdiń genetıkalyq materıalyn jınaýǵa eki jyl ýaqyt jumsaǵan. Olardyń arasynda Shyǵys Azııa, Ońtústik-Shyǵys Azııa, Eýropa, Afrıka jáne Soltústik Amerıka bar.
DNK nátıjelerin taldaý negizinde ǵalymdar ıtterdi qolǵa úıretý 33 myń jyl buryn Shyǵys Azııanyń ońtústiginde bastalǵanyn rastap shyqty. 15 myń jylǵa jýyq ýaqyt buryn ıtter Orta Shyǵysta jáne Afrıkada jáne shamamen 10 myń jyl buryn Eýropada paıda bolǵan. Keıinnen bul úı janýarlary ıelerimen birge Amerıkaǵa da qonystanǵan.
